पुणे  : जिल्ह्यात दुष्काळाची दाहकता वाढत आहे. आता पाणी टंचाईपाठोपाठ चाऱ्याचा प्रश्न गंभीर होत आहे. चारा उपलब्धतेअभावी जीवपाड जपलेली जनावरे सांभाळायची कशी, असा प्रश्न शेतकऱ्यांसमोर उभा आहे. जनावरांना चारा पुरवठा करण्यासाठी पुरंदर, बारामती, दौंड तालुक्यातून चारा छावण्या सुरू करण्याचे प्रस्ताव जिल्हा परिषदेकडे आले आहेत. याबाबत जिल्हा प्रशासनाकडे पाठपुरावा करण्यात येणार आहे, अशी माहिती पशुसंवर्धन विभागातर्फे देण्यात आली.

यंदा परतीच्या पावसाने हुलकावणी दिल्यामुळे जिल्ह्यात पाणीटंचाईसह चाऱ्याचा प्रश्‍न दिवसेंदिवस गंभीर होत आहे. जिल्ह्यात दहा लाखांहून अधिक जनावरे आहेत. एप्रिल २०१९ पर्यंत चारा पुरेल एवढा साठा उपलब्ध असल्याचे प्रशासनाकडून सांगण्यात आले. परंतु, बारामती, जुन्नर, पुरंदर आणि दौड तालुक्‍यांतील काही गावांमध्ये अात्तापासून चाऱ्याचे संकट उभे राहिले आहे. त्यामुळे या भागात जनावरांसाठी शासनाकडून तात्काळ उपाययोजना, तसेच चारा छावण्या सुरू कराव्यात, असे प्रस्ताव विविध शेतकरी संघटना, गावांकडून आले आहेत. जिल्हा परिषदेकडून हे प्रस्ताव पुढील कार्यवाहीसाठी तात्काळ जिल्हाधिकारी यांच्याकडे पाठविण्यात आले.

दुष्काळ निवारणासाठी उपाययोजना सुरू

जिल्हा परिषदेच्या टंचाई आराखड्यानुसार यंदा शिरूर तालुक्यातील पाबळ, दौंड तालुक्यातील जिरेगाव पेडवी, स्वामी चिंचाेली, बारामतीतील सुपे, मोरगाव, जळगाव, इंदापूरमधील कळस निरगुडे, जुन्नर तालुक्यातील नळावणे, आणे, आंबेगावतील वडगाव पीर, खेडमधील कन्हेरसर परिसरमध्ये चारा टंचाई भासण्याची शक्यता आहे. पुढील काळातील संभाव्य दुष्काळी परिस्थितीबाबत जिल्हा परिषदेने आतापासून नियोजन सुरू केले आहे, असे पशुसंवर्धन अधिकारी डॉ. शिवाजी विधाटे यांनी सांगितले.