नाशिक : राज्यात दोन लाखांवरील कर्ज असलेल्या शेतकऱ्यांना दोन लाखांपर्यंत कर्जमाफी देण्याची घोषणा राज्याचे अर्थमंत्री अजित पवार यांनी केली. या घोषणेच्या माध्यमातून नाशिक जिल्हा मध्यवर्ती बँकेच्या १९,९१६ सभासदांना दिलासा मिळण्याचा मार्ग सुकर होणार आहे.

मात्र चालू वर्षी अतिवृष्टीमुळे नुकसान झाल्याने २ लाखांवरील रक्कम भरण्यासाठी एकवेळ समझोता योजनेंतर्गत हप्ते तसेच त्याची मुदत वाढून मिळावी, अशी मागणी होत आहे.

जिल्हा बँकेने १ एप्रिल २०१४ ते ३१ मार्च २०१९ अखेर एकूण १९,८२२ शेतकऱ्यांना कर्ज वितरीत केले होते. त्यामध्ये ४६ शेतकऱ्यांचे कर्ज पुनर्गठन प्रकरणे असे मिळून असे एकूण १९,९१६ खाती आहेत. त्यासाठी ५४३ कोटी ४ लाख १५ हजार इतकी रक्कम वितरित केली आहे. प्रामुख्याने द्राक्ष, डाळिंब, कांदा व ऊस पिकासाठी या रकमेचे वाटप झाले आहे.

 सरकारच्या निर्णयामुळे बँकेला ३९८ कोटी ३२ लाख प्राप्त होणार आहेत. शेतकऱ्यांच्या डोक्यावर असलेला बोजा २ लाखांपर्यंत हलका होणार आहे. मात्र, त्यावरील कर्ज संबंधित खातेदारास अगोदर भरावे लागणार आहे. यासाठी शेतकऱ्यांना फायदा तर होईल. मात्र, वरील उत्पन्न नसल्याने रकमेच्या भरण्याबाबत नियोजन करावे लागणार आहे. २ लाखांवरील कर्जाची रक्कम नेमकी कशी भरायची याबाबत अजून स्पष्टता नाही. त्यामुळे २ लाखांवरील रकमेचे हप्ते करून घ्यावेत व ही रक्कम भरण्यासाठी मुदतवाढ द्यावी, अशी मागणी कर्जदार शेतकरी करत आहेत.

सरकारने दिलासा दिला आहे. मात्र, चालू वर्षी द्राक्ष हंगाम वाया गेला, त्यामुळे उत्पन्न हाती आलेले नाही. त्यामुळे दोन लाखांवरील रकमा कशा भरायच्या हा आमच्यासमोर मोठा प्रश्न आहे. सरकारने आम्हाला हप्ते करून वरील रक्कम भरण्यासाठी मुदतवाढ द्यावी.  - नितीन निफाडे, द्राक्ष उत्पादक, शिरवाडे वणी, ता. निफाड 

सत्ताधाऱ्यांनी सत्तेवर येताना संपूर्ण कर्जमाफीची घोषणा केली. मात्र ती पूर्ण केलेली नाही. दोन लाखांवरील कर्ज असलेल्या शेतकऱ्यांना दोन लाखांपर्यंत कर्ज माफ करण्याची घोषणा केली आहे. मात्र मागील पाच वर्षात निसर्गाच्या लहरीपणामुळे घेतलेले व पुनर्गठन केलेले कर्ज प्रकरणाचे हप्ते न भरता आल्याने बोजा वाढला आहे. म्हणून सरकारने आता हा तुटपुंजा प्रयत्न करत असताना दोन लाखांच्या वरील रकमेवरील व्याज माफ करून मुद्दलीमध्ये ५० टक्के सूट द्यावी. - कैलास भोसले, कोषाध्यक्ष, महाराष्ट्र राज्य द्राक्ष बागायतदार संघ