बुलडाणा ः राज्यात नऊ जागांसाठी २१ मे रोजी होत असलेल्या विधान परिषद निवडणुकीत सत्तारुढ आघाडीकडून स्वाभिमानीला एखाद्या जागेची संधी दिली जाते काय, याबाबत पुन्हा एकदा चर्चांना सुरुवात झाली आहे. यानिमित्ताने बुलडाण्यात स्वाभिमानीचे नेते रविकांत तुपकर यांच्या उमेदवारीबाबत तर्कवितर्क व्यक्त होऊ लागले आहेत. लोकसभा निवडणुकीच्यावेळी आघाडीकडून त्यांना परिषदेच्या जागेबाबत आश्‍वासन दिल्याचे समर्थक सांगत आहेत. 

स्वाभिमानीचे संस्थापक माजी खासदार राजू शेट्टी यांनी विद्यमान आघाडीचे समन्वयक व राष्ट्रवादी काँग्रेसचे अध्यक्ष शरद पवार यांच्याकडे आगामी निवडणुकीत स्वाभिमानीला जागा देण्याबाबत पत्र दिल्याची माहिती आहे. आघाडीने आपला घटकपक्ष असलेल्या स्वाभिमानीला जागा दिली तर त्याठिकाणी कोणाची वर्णी लागेल याबाबत चर्चा होत आहेत. त्यात रविकांत तुपकर यांचे नाव आघाडीवर आहे. 

मागील लोकसभा निवडणुकीच्यावेळी तुपकरांची संधी आघाडीच्या उमेदवारासाठी चुकविण्यात आली होती. त्यांना पुढील काळात योग्यवेळी संधी दिली जाईल, असा शब्द देण्यात आल्याचे आता समर्थक सांगत आहेत. त्यामुळेच आता परिषदेच्या निवडणुकीच्या पार्श्‍वभूमीवर तुपकरांच्या उमेदवारीबाबत विविध तर्कवितर्क व्यक्त होऊ लागले. 

रविकांत तुपकर यांनी स्वाभिमानीसाठी विदर्भ-मराठवाड्यासह विविध जिल्ह्यांमध्ये संघटनात्मक बांधणीचे काम केले आहे. विदर्भात अमरावती जिल्‍ह्यात स्वाभिमानीच्या उमेदवाराने यंदाच्या विधानसभा निवडणुकीत खातेही उघडले आहे. आघाडीच्या उमेवादारांचा स्वाभिमानीच्या नेत्यांनी ठिकठिकाणी प्रचार केला. असे असूनही आघाडीने घटक पक्ष असलेल्या स्वाभिमानीला मंत्रीमंडळात संधी दिलेली नाही. आता छोट्या पक्षांना स्थान दिल्या गेल्यास स्वाभिमानीचा विचार केल्या जाईल का हाही प्रश्‍न आहे.