मुंबई : राज्यात शेतकऱ्यांना राज्य सरकारने ठरविलेला दुधाचा दर न देणाऱ्या दूध संघांना बरखास्त करणार असल्याचा इशारा मुख्यमंत्री देवेंद्र फडणवीस यांनी गुरुवारी (ता.३) दिला. राज्यात मोफत दूधवाटप आंदोलनाच्या पार्श्वभूमीवर ते बोलत होते. या वेळी मुख्यमंत्री म्हणाले, ‘‘राज्य सरकारने गाईच्या दुधासाठी २७ रुपये प्रतिलिटर दर निश्चित केला आहे. मात्र सरकारने ठरविलेला दुधाचा हा दर दूध संघांकडून दिला जात नसल्याच्या तक्रारी आहेत. दूध उत्पादक शेतकऱ्यांबद्दल आडमुठी भूमिका घेणाऱ्या दूध संघांवर राज्य सरकार कडक कारवाई करणार आहे.’’ मुख्यमंत्र्यांनी या वेळी सरकार राज्याचा दुधाच्या एका ब्रँडसाठी आग्रही असल्याचे सांगितले. त्यासाठी १० बैठका झाल्या, मात्र अजूनही निर्णय होऊ शकलेला नाही, असेही त्यांनी स्पष्ट केले.