जाफराबाद, जि. जालना : कायमस्वरूपी अवहेलना झालेल्या सीताफळ या फळपिकाचं भविष्य आता उज्ज्वल आहे. त्याची तांत्रिक पद्धतीने लागवड झाल्यास त्यातून शाश्वत उत्पन्न मिळू शकते, असे प्रतिपादन ॲग्रोव्हिजन गटशेती संघाचे प्रमुख श्री. संजय मोरे पाटील यांनी केले.

जाफराबाद तालुक्यातील काळेगाव येथे गुरुवारी(ता. ९) पार पडलेल्या ॲग्रोव्हिजन गटशेती संघातील संलग्न शेतकऱ्यांच्या नियमित मासिक चर्चासत्रात श्री. मोरे बोलत होते. गटशेती, सीताफळ लागवड, व्यवस्थापन, ब्रॅंडिंग, मार्केटिंग, प्रक्रिया उद्योग आदी विषयांवर त्यांनी शेतकऱ्यांना माहिती दिली. यावेळी व्यासपीठावर पंचायत समितीचे कृषी अधिकारी राजरत्न गायकवाड, काळेगावचे सरपंच वसंत चव्हाण, चेअरमन बाबुराव पिंपळे, माजी सरपंच मनोहर चव्हाण, भानुदास डोईफोडे, आनंद शेळके, विजय चव्हाण, कृषी सहायक डी. ई. घुगे, भाऊराव दरेकर, भाऊराव आटफळे यांची उपस्तिथी होती.

तत्पूर्वी शिवारफेरी करण्यात आली. त्यात ठिबक, बेडवरील अद्रक व फिनोलेक्स प्लॅसॉन यांच्या सौजन्याने गटशेतीतील शेतकरी विनोद पिंपळे यांच्या शेतात सबसरफेज ड्रीप ऊस पीक पाहणी कार्यक्रम झाला. शाहीर दिलीप पिंपळे यांनी प्रास्ताविक व संचलन केले. कार्यक्रमाच्या यशस्वीतेसाठी विनोद पिंपळे, गणेश शेंडगे, अमोल जाधव, रामेश्वर तायडे, प्रदीप अहिरे यांच्यासह गावकऱ्यांनी परिश्रम घेतले.