नाशिक : मुक्त विद्यापीठातील कृषि विज्ञान केंद्राने ‘ॲग्रो ॲम्ब्युलन्स’द्वारे पिकांवर रोगांचे निदान, माती परिक्षणाचा उपक्रम राबवावा, असे आवाहन जिल्हाधिकारी सुरज मांढरे यांनी केले. 

यशवंतराव चव्हाण महाराष्ट्र मुक्त विद्यापीठातर्फे १० कोटी रूपयांचा धनादेश मुख्यमंत्री सहाय्यता निधीस देण्यात आला. मांढरे यांनी समक्ष विद्यापीठात जाऊन विद्यापीठाचे कुलगुरू डॉ. ई. वायुनंदन यांच्याकडून तो स्विकारला. विद्यापीठाचे वित्त अधिकारी एम. बी. पाटील, कृषि विज्ञान केंद्राचे प्रमुख रावसाहेब पाटील, उपकुलसचिव विवेक ओक, कैलास मोरे, चंद्रकांत पवार, कैलास मोहिते उपस्थित होते. 

मांढरे म्हणाले, ‘‘ गेल्या दोन महिन्यांच्या काळात शेतकरी आत्महत्यांमध्ये कमालीची घट झाली. वैद्यकीय उपचार घेण्याच्या प्रमाणातही लक्षणीय घट झाली. इतर आजारांची रूग्णसंख्याही नोंद घेण्याइतपत कमी झाली. येणाऱ्या काळात या बदलांवर आधारित शेती, आरोग्य, सामाजिक, आर्थिक व जीवनशैलीशी संबंधित प्रकल्प मुक्त विद्यापीठाच्या संयुक्त विद्यमाने जिल्हा प्रशासनाद्वारे राबविण्यात येतील. यशवंतराव चव्हाण महाराष्ट्र मुक्त विद्यापीठाचे महाराष्ट्राच्या जडण-घडणीत महत्वाचे योगदान आहे. कोरोनाच्या पार्श्वभूमीवर मदत करून महाराष्ट्राचे कोरोनानंतरचे भविष्य घडविण्यातही मोलचा वाटा घेतला आहे.’’ 

डॉ. ई .वायुनंदन म्हणाले, ‘‘महाराष्ट्राचे शिल्पकार यशवंतराव चव्हाण यांच्या नावाने सुरू असलेले हे लोकविद्यापीठ सामाजिक जाणिवेतून सतत आपली जबाबदारी पार पाडत आहे. त्यामुळे महाराष्ट्र संकटात असताना मुक्त विद्यापीठाने ही मदत केली.’’  जीवनशैलींवरील परिणाम अभ्यासणार 

कोरोनाचे जीवनशैलीवर काही सकारात्मक बदलसुद्धा झाले आहेत. येणाऱ्या काळात जिल्हा प्रशासन व विद्यापीठातर्फे कोरोनानंतर शेती, आरोग्य, सामाजिक, आर्थिक व जीवनशैलीवर होऊ घातलेल्या परिणामांवर अभ्यास प्रकल्प राबविण्याचा मानस आहे, असे मांढरे यांनी सांगितले.