नांदेड : ‘‘पंतप्रधान पीक विमा योजनेंतर्गत सन २०२०-२१ या रब्बी हंगामासाठी पीकविमा प्रस्ताव स्वीकारणे सुरू आहे. रब्बी ज्वारीसाठी पीक विमा भरण्याची अंतिम तारीख ३० नोव्हेंबर, तर गहु बागायती, हरभरा पिकासाठी १५ डिसेंबरची  अंतिम मुदत आहे.

जिल्ह्यातील शेतकऱ्यांनी या पीकविमा योजनेचा लाभ घ्या,’’ असे आवाहन जिल्हाधिकारी डॉ. विपिन यांनी केले. पंतप्रधान पीक विमा योजनेंतर्गत जिल्ह्यात इफ्कोटोकियो कंपनीची नियुक्ती केली आहे. या इफ्कोटोकियो कंपनीच्या वतीने जिल्ह्यात पीकविमा प्रस्ताव स्वीकारणे सुरू आहे. 

पीकनिहाय समाविष्ट तालुके

हरभरा : नांदेड, अर्धापूर, बिलोली, अर्धाबाद, हदगाव, देगलूर, मुखेड व किनवट (सर्व मंडळ). गहू (बागायती) : नांदेड (वजीराबाद व नांदेड ग्रामीण वगळून सर्व मंडळ), कंधार, लोहा, हदगाव, हिमायतनगर, किनवट, अर्धापूर, मुदखेड, बिलोली, धर्माबाद, नायगाव व भोकर तालुके. रब्बी ज्वारी : बिलोली, धर्माबाद, मुखेड (सर्व मंडळ), देगलूर, नायगाव, नांदेड, किनवट व हदगाव तालुके.