नांदेड : मुखेड तालुक्यात इफ्को टोकियो पीकविमा कंपनीचा मनमानी कारभार थांबवून मुखेड तालुका ओला दुष्काळग्रस्त जाहीर करण्याची मागणी रयत क्रांती संघटनेच्या वतीने बुधवारी (ता. २२) करण्यात आली. संघटनेच्या वतीने धरणे आंदोलन करून तहसीलदार, कृषी अधिकाऱ्यांना निवेदन देण्यात आले.  इफ्को टोकियो पीकविमा कंपनीच्या पंचनामे करणाऱ्या थर्ड पार्टीच्या मुलांची पात्रता नाही. शासन नियमानुसार नुकसानीचे मूल्यांकन निश्‍चित करण्यासाठीचा अनुभव व शैक्षणिक पात्रता त्यांच्याकडे नाही. पीकविमा कंपन्यांनी निकषानुसार पर्यवेक्षकांची नियुक्ती करावी. विमा कंपनीकडून भरती करण्यात आलेल्या अपात्र प्रतिनिधीची नियुक्ती रद्द करावी. या सोबतच मुखेड तालुक्यातील शेतकरी अतिवृष्टीमुळे संकटात आल्यामुळे सरसकट पीकविम्याचा लाभ द्या, अशी मागणी रयत क्रांती संघटनेचे जिल्हाध्यक्ष बालाजी पाटील ढोसणे यांनी केली.  या वेळी पंचायत समिती सदस्य जे. बी. कांबळे, बालाजी वडजे, व्यकंट पाटील इंगळे, रमाकांत पाटील जाहूरकर, वैभव पाटील राजूरकर, योगेश पाटील जांभळीकर, माधव पाटील खदगावे, रामदास वाघमारे, पंढरी कांबळे, नागेश शिंदे, बालाजी राजूरवाड, नवनाथ पाटील तारदडकर, शिवाजी इंगळे, रणजित कदम, माधव घाटे, व्यंकट इंगळे, बालाजी इंगळे, राहुल देशमुख, बजरंग हिवराळे, निशिकांत हिवराळे आदी शेतकरी उपस्थित होते.