जळगाव ः खानदेशात भारतीय कापूस महामंडळाने (सीसीआय) कापूस खरेदीला सुरवात केली असून, जळगाव जिल्ह्यात आव्हाणे (ता. जि. जळगाव) येथील लक्ष्मी कॉटस्पीन व पाचोरा येथील जिनींग प्रेसिंग कारखान्यात खरेदी केंद्रे सुरू केली आहेत.  कापसाची १२ टक्‍क्‍यांपर्यंतची आर्द्रता, ३.५ ते ४.३ टक्के मायक्रोनीयर (ताकद) व २९.५ ते ३०.५ मिलिमीटर लांब धाग्याच्या दर्जेदार कापसाला ५५५० रुपये दर दिला जाणार आहे. कमी दर्जाच्या किंवा अधिक आर्द्रतेच्या कापसाची खरेदी टाळली जाईल. २७.५ ते २८.५ मिलिमीटर लांब धागा, ३.५ ते ४.७ मायक्रोनीयरच्या कापसाला ५४५० रुपये प्रतिक्विंटलचा दर दिला जाईल. कापूस विक्रीसाठी आणताना कापूस पीक पेऱ्याची नोंद असलेला सातबारा उतारा, बॅंक पासबुकची झेरॉक्‍स, आधार कार्ड, आठ अ उतारा आणावा लागणार आहे. जळगाव येथील केंद्रात जिल्ह्यातून कापसाची आवक झाली. खरेदीच्या शुभारंभाला जळगाव बाजार समितीचे सभापती कैलास चौधरी, उपसभापती सुरेश पाटील, जिनींग प्रेसिंग कारखानदार लक्ष्मण पाटील, प्रकाश नारखेडे, अविनाश भालेराव आदी उपस्थित होते.  धुळे, नंदुरबारातही खरेदी सुरू होणार सीसीआयतर्फे खानदेशात धुळे जिल्ह्यात शिरपूर व नंदुरबारमधील शहादा व नंदुरबारातही कापूस खरेदी सुरू होणार आहे. मध्यंतरी शिरपूर येथे केंद्र सुरू केले होते. परंतु, अधिक आर्द्रतेचा कापूस येत असल्याने कापसाची खरेदी या केंद्रात थांबविण्यात आली होती.  पणनच्या खरेदीची प्रतीक्षा पणन महासंघाची कापूस खरेदी जळगाव, धुळे व नाशिक जिल्ह्यांत खरेदी करण्यासंबंधी स्थानिक अधिकारी, संचालक यांनी नियोजन केले. बुधवारी (ता. २०) खरेदी सुरू करण्यात येईल, असा दावा पणन महासंघाच्या सूत्रांनी केला होता. परंतु, खरेदीसंबंधीचे प्रस्ताव व इतर प्रक्रिया यास काही दिवस लागणार आहेत. यामुळे खानदेशात पणन महासंघाची कापूस खरेदी सुरू झालेली नसल्याची माहिती मिळाली. महासंघ जळगाव जिल्ह्यात अमळनेर, धरणगाव, पारोळा, धुळे, नाशिकमधील मालेगाव, येवला येथे खरेदी केंद्र सुरू करणार असल्याची माहिती मिळाली.