सोलापूर : सिध्देश्वर यात्रा सुरळीतपणे पार पाडण्यासाठी सर्व विभाग, यात्रा कमिटी आणि देवस्थान पंच कमिटीने प्रशासनास सहकार्य करावे, यात्राविषयक कामे समन्वयाने करावीत, असे आवाहन उपविभागीय अधिकारी शिवाजी जगताप यांनी केले.        

सिद्धेश्वर यात्रा २०१९ संदर्भात जिल्हाधिकारी कार्यालयाच्या सेतू सभागृहात बैठक झाली. महापालिका, पोलिस, महावितरण, जिल्हा आपत्ती व्यवस्थापन, आरोग्य विभागाचे संबधित अधिकारी, सिद्धेश्वर यात्रा कमिटी आणि देवस्थान पंच कमिटीचे पदाधिकारी उपस्थित होते.

जगताप म्हणाले, ‘‘यात्रा कालावधीत आपत्ती व्यवस्थापन कायद्याअंतर्गत सर्व विभागांनी समन्वयाने काम करावे. भाविकांना आवश्यक सुविधा उपलब्ध करून देण्यास प्राधान्य द्यावे. आवश्यक ठिकाणी सी.सी.टी.व्ही. लावावेत. पिण्याचे पाणी, पुरेशी शौचालये, आरोग्य विभाग पथक कार्यरत ठेवावे. अत्यावश्यक औषध साठा उपलबध ठेवावा. वाहनाच्या पार्किंगसाठी पार्किंग झोन करावेत.’’

होम मैदान आणि स्टॉलसंदर्भात महापालिका आयुक्ताकडे बैठक घ्यावी, असेही ते म्हणाले.