पुणे : सुट्टीच्या टाळेबंदीमध्ये अत्यावश्‍यक सेवेत असल्याने शहरांमधील अन्नधान्य, फळे भाजीपाल्याचा पुरवठा सुरळीत ठेवण्यासाठी सर्व बाजार समित्या आणि जिल्हा उपनिबंधकांना बाजार समित्या स्थानिक पोलिस आणि महसूल प्रशासनासोबत समन्वय साधत सुरु करण्याचे आदेश संचालक सतीश सोनी यांनी (ता. १२) पुन्हा दिले आहेत. 

पणन संचालक सोनी यांनी जिल्हा उपनिबंधक आणि बाजार समित्यांना दिलेल्या आदेशात म्हटले आहे,‘‘कोरोना विषाणूच्या फैलावाच्या पार्श्वभूमीवर आपल्या जिल्ह्यातील काही बाजार समित्या बंद ठेवल्या असल्याचे निदर्शनास आलेले आहे. कोरोनामुळे टाळेबंदीची परिस्थिती उद्भवली असली तरी अन्न, फळे भाजीपाला पुरवठा साखळी सुरळीत राहणे अत्यंत आवश्यक आहे. त्यामुळे राज्य शासनाच्या आदेशा नुसार कोरोना फैलाव रोखण्यासाठीच्या आवश्यक त्या प्रतिबंधात्मक उपाययोजना करून राज्यातील बाजार समित्या सुरू ठेवणे आवश्यक आहे. तसेच राज्य शासनाने देखील जारी केलेल्या प्रश्नांचे निरसन केलेले आहे. ते सोबत पाठवीत आहे. त्याची अंमलबजावणी करावी.’’ 

जिल्हा उपनिबंधकांनी आपल्या जिल्हा व शहर पोलिस जिल्हाधिकारी, मनपा आयुक्त यांच्याशी समन्वय साधत सहकार्य घेऊन आपल्या जिल्ह्यातील बाजार समित्या सुरू राहतील याकडे कटाक्षाने लक्ष देणे आवश्यक आहे. ज्या बाजार समित्यांवर शासकीय अधिकारी हा शासन नियुक्त प्रशासक किंवा सचिव म्हणून कार्यरत आहे अशा प्रशासक, सचिव यांनी विशेष लक्ष देऊन काळजी घेणे आवश्यक आहे . बाजार समित्यांमध्ये गर्दी होऊ नये यासाठी शेतमालनिहाय चक्राकार पद्धतीने बाजार समित्या सुरु ठेवण्याच्या उपाययोजना कराव्यात, असे श्री. सोनी यांनी आदेशात म्हटले आहे.