अकोला ः ‘कोरोना’ विषाणू संसर्ग प्रादुर्भावाच्या पार्श्वभूमीवर सुरू असलेल्या संचारबंदीच्या कालावधीत जिल्ह्यातील कृषी सेवा केंद्र व कृषी निविष्ठा केंद्र सुरू ठेवावीत, असे निर्देश केंद्रीय राज्यमंत्री संजय धोत्रे यांनी जिल्हा प्रशासनाला दिले. त्यानुसार जिल्हाधिकारी जितेंद्र पापळकर यांनी यासंदर्भातील आदेश काढले आहेत. 

केंद्रीय राज्यमंत्री धोत्रे यांनी जिल्हाधिकारी कार्यालयात आढावा बैठक घेतली. यावेळी आमदार रणधीर सावरकर उपस्थित होते. जिल्हाधिकारी पापळकर, मनपा आयुक्त संजय कापडणीस, शासकीय वैद्यकीय महाविद्यालयाचे अधिष्ठाता डॉ. शिवहरी घोरपडे, निवासू उपजिल्हाधिकारी संजय खडसे, तसेच अन्य अधिकारी उपस्थित होते. 

श्री. धोत्रे म्हणाले की, शेतकऱ्यांचे काम थांबू नये, त्यास अडचण निर्माण होऊ नये म्हणून यासाठी जिल्ह्यातील कृषी निविष्ठा व कृषी सेवा केंद्र सुरू ठेवावे. जेणेकरुन शेतकऱ्यांना सुविधा होईल. तसेच जिल्ह्यातील रेशन दुकानदारांनी गोरगरिबांना तीन महिन्यांचे अन्नधान्य वाटप करण्यास सुरुवात करावी. धोत्रे यांच्या सूचनेनुसार जिल्हाधिकारी पापळकर यांनी जिल्ह्यातील कृषी सेवा केंद्र व कृषी निविष्ठा केंद्र अत्यावश्यक सेवा म्हणून सकाळी ११ ते दुपारी तीन यावेळेत सुरू ठेवण्याचे निर्देश जारी केले. 

या निर्देशानुसार या केंद्रांवर पाच पेक्षा अधिक कर्मचारी कामगार काम करणार नाहीत, दुकानांमध्ये ग्राहकांची गर्दी होणार नाही व ग्राहकांमध्ये किमान आवश्यक अंतर ठेवण्याची कार्यवाही करण्याची अटही नमूद करण्यात आली आहे.