नाशिक : कृषिपंपधारकांवर थकित वीजबिलापोटी वीजपुरवठा खंडित करण्याची कारवाई महावितरणने सुरू केली आहे. मात्र अनेक शेतकऱ्यांना रीडिंग न घेताच अव्वाच्या सव्वा वीजबिले दिली. ग्राहक पंचायतीने अशा एका प्रकरणात चांदोरी येथील शेतकऱ्यास १० हजार रुपयांची नुकसानभरपाई देण्याचे आदेश दिले आहे.  सध्या कृषिपंपांच्या थकीत बिलापोटी वीजपुरवठा खंडित केला जात आहे. नाशिक शहर मंडलातील १ लाख ६५ हजार कृषिपंप ग्राहकांकडे ५९१ कोटी रुपयांची थकबाकी आहे. यातील १ लाख ६४ हजार ग्राहकांकडे ४३ कोटी रुपयांची चालू बिले थकीत आहेत. मालेगाव मंडलातील १ लाख ३९ हजार कृषिपंप ग्राहकांकडे ५९२ कोटी रुपयांची वीजबिले थकीत असून यातील १ लाख ३८ हजार ३०० ग्राहकांकडे ३५ कोटी ४२ लाख रुपयांची चालू थकबाकी आहे. मात्र थकबाकी असलेल्या अनेक शेतकऱ्यांना मीटर रिडींग न घेताच अंदाजे बिले प्राप्त झाली. यापैकीच चांदोरी येथील शेतकरी जगन्नाथ नाठे यांना ३२ हजार रूपये वीज बील प्राप्त झाले. यासंदर्भात त्यांनी ग्राहकपंचायतीकडे धाव घेतली असता वीज कायदा २००३ सेक्शन ५५ व ५७ तसेच भरपाईचा कायदा २००५ नुसार अंदाजे दिलेले बिल बेकायदा असून त्याबद्दल प्रतीमाह ४०० रुपयेप्रमाणे १० हजार रुपये भरपाई देण्याचे आदेश दिले. तसेच अंदाजे बिल व प्रत्यक्ष रीडिगनुसार बिल यातील फरक संबधित मीटर रीडर इंजिनिअर यांच्या पगारातून कापण्यात यावा, असेही या आदेशात म्हटले आहे. नाठे यांना ३२ हजार रुपये बिल आले होते. मात्र, प्रत्यक्षात ८ हजार रुपये बिल झाले. त्यांना १० हजार रुपये भरपाई मिळवून देण्यात आली. त्यामुळे ज्या शेतकऱ्यांना अशा प्रकारची अंदाजे बिले प्राप्त झाली असतील त्यांनी वीज ग्राहक तक्रार समिती विद्युत भवन नाशिक रोड येथे तक्रार दाखल करावी, असे आवाहन करण्यात आले आहे.