शिरोळ, जि. कोल्हापूर : येथील श्री दत्त शेतकरी सहकारी साखर कारखान्याच्या ऊस गळीत हंगामाची सोमवारी (ता. ८) सांगता झाली. कारखान्याने या हंगामात १२ लाख १२ हजार टन उसाचे गाळप करून १५ लाख १४ हजार ६०० साखर पोत्याचे उत्पादन केल्याची माहिती कारखान्याचे अध्यक्ष गणपतराव पाटील यांनी दिली. कारखान्याचे दैनंदिन गाळप आठ हजारांहून अधिक टनाचे राहिले.

श्री. पाटील म्हणाले, ‘‘कारखान्याने या हंगामात पुरवठा केलेल्या उसासाठी प्रति टन २८७७ रुपये उपलब्ध केले आहेत. कारखान्याच्या वतीने देशात प्रथमच क्षारपड जमीन सुधारणा प्रकल्प हाती घेतला आहे. आतापर्यंत जवळजवळ पाच ते सहा हजार एकरांवर काम पूर्ण झाले आहे. या हंगामात कारखान्याने सहा हजार क्विंटल सेंद्रिय साखरेचे उत्पादन केले आहे. पुढील हंगामातील उसासाठी ५२२ एकर क्षेत्राची नोंद झालेली आहे कारखान्याचे कार्यकारी संचालक एम. व्ही. पाटील यांनी प्रास्ताविक केले.

रावसाहेब भोसले यांनी स्वागत केले. उपाध्यक्ष सिदगोंडा पाटील, अण्णासाहेब पाटील यांचा सत्कार करण्यात आला. या वेळी ऊस विकास अधिकारी श्रीशैल हेगाना, ऊस विकास अधिकारी दिलीप जाधव, प्रोडक्शन मनेजर विश्वजीत शिंद, संजय संकपाळ आदीसह संचालक उपस्थित होते.