जिल्हा परिषद राबवणार वर्ककॅलेंडर संकल्पना
जळगाव : जिल्हा परिषदेत वर्ककॅलेंडर संकल्पना राबविली जाणार असून, त्या संदर्भातील सविस्तर माहती मुख्य कार्यकारी अधिकारी शिवाजी दिवेकर यांनी सर्व विभागप्रमुखांना सादर केली आहे. कामात गतिमानता, सुसूत्रता आणण्यासाठी ही संकल्पना आणण्यात आली आहे.
दिवेकर यांनी सुरवातीला सर्व विभागांचे कामकाज, त्यांच्याकडे उपलब्ध निधी, खर्चाची अंतिम तारीख आदी मुद्दे सर्व विभागांकडून मागविले आहेत. त्यानुसार हे वर्ककॅलेंडर तयार केले. जिल्हा परिषदेला नियोजन समितीकडून मिळणारा निधी वेळेत खर्च होत नाही. त्यामुळे निधी परत जाणे, तो खर्च करण्यासाठी पुन्हा परवानग्या घेणे, अशी कार्यवाही करावी लागते. हा निधी परत न जाता वेळेत खर्च होईल, यासाठी हे कॅलेंडर तयार केले आहे.
सर्व १४ विभागांकडून उपलब्ध निधीची माहिती घेतली. त्यात स्वनिधी व नियोजन समितीकडून प्राप्त निधी असे वर्गीकरण केले. हा निधी खर्च करण्यासंबंधी तांत्रिक माहिती भरणे, खर्चासाठी प्रशासकीय मान्यता घेणे, याचा कालावधी निश्चित केला आहे. कुठल्या कामाची केव्हा निवड करायची याचेदेखील निर्देश आहेत. व्यक्तिगत लाभाच्या योजनांबाबत लाभार्थींची संख्या निश्चित करून अंतिम मंजुरीचा कालावधीही निश्चित केला आहे. या वर्ककॅलेंडरनुसार योजनांबाबत कार्यवाही करणे बंधनकारक केले आहे.
या कॅलेंडरमध्ये जुलै महिन्यात काही विभागांना कामकाज गतीने करण्यासाठी निर्देश दिले आहेत. विषेश म्हणजे कृषी विभागाला व्यक्तिगत लाभाच्या योजनांबाबत कार्यवाहीच्या सूचना दिल्या आहेत. त्यात फवारणी पंप, अवजारे पुरविणे, एचडीपीई पाईपचे वितरण, कृषिपंप पुरवठा, पलटीनांगर पुरवठा आदी योजनांबाबत प्रशासकीय मान्यता मिळवून अंतिम मंजुरी घेण्याचे निर्देश आहेत, अशी माहिती मिळाली.