रत्नागिरी : खरीप हंगामासाठी महाबीजकडून घेण्यात आलेले भात बियाणे निकृष्ट दर्जाचे असल्याचा प्रकार लांजा तालुक्यात पुढे आला आहे. काही गावातील भात रोपांमध्ये मोठ्या प्रमाणात खेंड दिसून आली असून रोपांची वाढ खुंटली आहे.  याबाबत कृषी विभागाकडे तक्रारी आल्या आहेत.

शासनाच्या बियाणे महामंडळाकडून दरवर्षी खरीप हंगामात अनुदानावर आधारित कृषी सेवा केंद्राकडून भात आणि अन्य बियाणे वितरित केले जाते. २०२०-२१ च्या खरीप हंगामात लांजा खरेदी विक्री संघाकडून तालुक्यातील शेतकऱ्यांना २,६८० किलो भात बियाणे वितरित करण्यात आले होते. यामध्ये ज्या भात बियाणे ६४० किलोचे आहे. वेरळ येथील एका शेतात ज्या जातीच्या भात बियाण्याची लागवड करण्यात आली आहे. सध्या ही रोपे कमी उंचीची आहेत. त्यातील काही रोप वांझोटी असून त्यात तांदूळ मिळणे शक्य नाही. काही रोपांची उंची अधिक आहेत. त्याला लोम्बी लागलेली नाही. यातील काही रोप पावसामुळं पडली आहेत.

वेरळ बरोबर शिरंबवली, कणगवली, आसगे, खेरवसे, हसोळ, तळवडे, अंजनारी, प्रभानवली, खोरनीनको, वाडगाव या गावातही भात बियाण्याबाबत प्रकार दिसून आले आहेत. या भातात मोठ्या प्रमाणात खेंड ही असल्याचे कृषी विभागाच्या पाहणीत आढळून आले आहे. तालुक्यातील या बाधित क्षेत्राची पीक नियंत्रण समिती कडून पाहणी करण्यात येणार आहे.

वेरळ येथील शेतकरी काशिनाथ जाधव यांच्या शेताची नुकतीच कृषी विभागाच्या अधिकाऱ्यांनी पाहणी केली होती. याबाबत लांजा तालुका कृषी अधिकारी ए. बी. धोंडे म्हणाले की, बियाण्याविषयी आलेल्या तक्रारीची शहानिशा सुरू आहे. कृषी सहायक पाहणी करत आहेत. काही ठिकाणी शेतकऱ्याच्या तक्रारीत तथ्य आढळून आले आहे. महाबीज मंडळ जिल्हा प्रतिनिधी यांना कळवण्यात आले आहे.