सोलापूर ः सोलापूर जिल्ह्यात बेकायदेशीरपणे बोगस कृषी विद्यापीठ स्थापन करून त्याअंतर्गत मागासवर्ग खुले कृषी विद्यालय या नावाखाली राज्यभरात जवळपास ४२ कृषी विद्यालये सुरू झाली. त्या माध्यमातून विद्यार्थी आणि पालकांची आर्थिक लूट होत असल्याचे लक्षात आल्यानंतर चार वर्षांपूर्वीच या बोगस विद्यापीठाचा संस्थापक आणि त्याच्या सहकाऱ्याविरुद्ध कृषी विभागाकडे तक्रार दाखल झाली होती. त्यानंतर सोलापूर आणि जळगाव जिल्ह्यातील पाचोरा अशा दोन ठिकाणी पोलिसांत फिर्यादी दाखल झाल्या. पण कारवाईच्या अनुषंगाने दोन्हीही पातळ्यांवर पुढे काहीच हालचाली झाल्या नाहीत.  अण्णा इसुरेनामक व्यक्ती ही या विद्यापीठाचे संस्थापक असल्याचे सांगितले जाते. राज्यातील काही जिल्ह्यांत तिथल्या लोकांना हाताशी धरून त्याने पद्धतशीरपणे संपर्क ठेवून या विद्यालयाच्या शाखा वाढवल्या. सोलापूर जिल्ह्यातील अनेक ‘दादा’, ‘मामा’, ‘आबा’ यांसारख्या राजकीय नेत्यांच्या हस्ते त्याने या कृषी विद्यालयाची दिमाखात उद्घाटने केली. त्यामुळे साहिजकच विद्यार्थी आणि पालकांचा त्यावर अधिक विश्‍वास बसला. पण या कृषी विद्यालयाच्या मान्यतेबाबत कोणीच चौकशी किंवा खोलात गेले नाही.  या कृषी विद्यालयाच्या लेटरहेडवर भारत सरकारच्या अधिकृत अशोकस्तंभ या राजमुद्रेच्या चिन्हाचाही वापर केलेला होता. त्यामुळे संशयाचा विषयच राहिला नाही; पण बोगस कृषी विद्यापीठ ज्या भागात स्थापले गेले. त्या अक्कलकोट तालुक्‍यातील कृषी विभागात कार्यरत असणारे पर्यवेक्षक नरेंद्र कल्याणशेट्टी यांना ज्या वेळी तडवळ, कोन्हाळी या भागातील या कृषी विद्यालयासंबंधी संशय आला. तेव्हा चार वर्षांपूर्वी त्यांनी स्वतःच या संबंधी कृषी विभागाकडे तक्रार केली. पण आजतागायत त्यांना उत्तर मिळालेले नाही. गेल्या चार वर्षांत अनेक विद्यार्थी आणि पालकांची यामध्ये मोठी आर्थिक फसवणूक झाल्याचे उघड झाले. सोलापुरात संभाजी मस्के आणि पाचोऱ्यात संजय पाटील यांनी इसुरे याच्यावर २०१५ मध्ये गुन्हे दाखल केले. पण पुढे काहीच कारवाई झाली नाही. शिवाय विद्यार्थी आणि पालकांपैकीही अद्याप कोणीच पुढे आलेले नाही. त्यामुळे हे प्रकरण आणि त्याचा तपास जैसे थेच आहे. विद्यार्थ्यांना कृषी विद्यापीठाची सहल  या कृषी विद्यापाठाशी संबंधित कृषी विद्यालयातील विद्यार्थ्यांना अभ्यासाचा भाग म्हणून राज्यातील अनेक भागांत कृषी सहली घडवून आणण्यात आल्या. विशेष म्हणजे राज्यातील एका कृषी विद्यापीठाचीही सहल या विद्यार्थ्यांना घडवून आणण्यात आली. पण तरीही ‘त्या’ कृषी विद्यापीठाला या कृषी विद्यालयाचा संशय येऊ नये, याबाबतही आश्‍चर्य व्यक्त होत आहे.