पाचोरा, जि. जळगाव : खडकदेवळा (ता. पाचोरा) येथील अरुण पाटील या शेतकऱ्यासंदर्भात घडला असून, गेल्या वर्षी झालेल्या नुकसानीची भरपाई म्हणून त्यांच्या खात्यात अवघे २७० रुपये जमा झाले आहेत. हा विषय सध्या तालुक्यात चांगलाच चर्चेत आला आहे. 

अरुण पाटील यांची खडकदेवळा शिवारात शेती आहे. गेल्या वर्षी अतिपावसामुळे हाताशी आलेले पीक व तोंडाशी आलेला घास नष्ट झाला. नेहमीप्रमाणे महसूल विभागाने नुकसानीचे पंचनामे केले. शेतकऱ्यांच्या बँक खात्यात भरपाईची रक्कम जमा झाली. ही रक्कम अजूनही बहुतांश शेतकऱ्यांना मिळाली नसल्याचा सूरही कानी पडतो. परंतु अरुण पाटील यांच्या बँक खात्यात नुकसान भरपाईपोटी अवघे २७० रुपये जमा झाले आहेत.  

अतिपाऊस, नैसर्गिक आपत्ती अथवा पावसाअभावी शेतकऱ्याच्या खरीप व रब्बी पिकांचे नुकसान होण्याचे सातत्य गेल्या काही वर्षांपासून कायम आहे. अशा नुकसानीचे महसूल विभागाच्या वतीने पंचनामे होऊन भरपाईसाठी शासनाकडे अहवाल पाठवणे व शासनाने नुकसानग्रस्त शेतकऱ्यांच्या बँक खात्यात भरपाईची रक्कम जमा करणे, ही प्रक्रिया सातत्याने सुरूच असते. मिळणारी भरपाई झालेल्या नुकसानीच्या किती प्रमाणात असते व त्यामुळे नुकसानग्रस्त शेतकऱ्याला कितपत दिलासा मिळतो, हा कदाचित संशोधनाचा विषय ठरेल. त्यामुळेच शासनाच्या या नुकसान भरपाईच्या विषयावर सातत्याने टीकेचा सूर उमटताना दिसतो.

न्यायाची मागणी 

या प्रकाराबाबत संतप्त भावना व्यक्त होत असून, अरुण पाटील यांनी तहसीलदार कैलास चावडे यांच्याकडे लेखी पत्र देऊन नुकसानभरपाई रकमेसंदर्भात चौकशी होऊन योग्य ती भरपाई व न्यायाची मागणी केली आहे.