पुणे : उत्तरेकडील शीत लहरींनी राज्यावर स्वारी केल्याने राज्यात थंडीची तीव्र लाट आली आहे. रात्रीच्या तापमानात मोठी घट झाल्याने हुडहुडी वाढली आहे, तर दिवसाचे तापमान घसरून दुपारही गारठा असल्याने दिवस थंड ठरत आहेत. बुधवारी (ता. ३०) सकाळपर्यंतच्या २४ तासांमध्ये विदर्भातील गोंदिया येथे दिवस सर्वाधिक थंड ठरला. दिवसाचे तापमान सरासरीपेक्षा ७.३ अंशाने घसरून गोंदियात राज्यातील नीचांकी २२ अंश सेल्सिअस कमाल तापमानाची नोंद झाली.  वाऱ्याच्या दिशेत झालेले बदल, आर्द्रता आणि ढगाळ हवामान यामुळे राज्यात थंड दिवस अनुभवायला मिळत आहेत. हवामान विभागाच्या परिमाणानुसार रात्रीचे (किमान) तापमान १० अंशांपेक्षा कमी असेल आणि दिवसाच्या (कमाल) तापमानात सरासरीपेक्षा ४.५ ते ६.४ अंशांपर्यंत घट झाली असेल तर तो दिवस ‘थंड दिवस’ समजण्यात येतो.   तसेच कमाल तापमानात ६.५ अंशांपेक्षा अधिक घट झाली असेल तर तो दिवस ‘अतिथंड दिवस’ ठरतो. गोंदियासह बुलडाणा येथेही राज्यातील दिवसाचे नीचांकी २२ अंश सेल्सिअस तापमान नोंदले गेले. या ठिकाणी कमाल तापमानात तब्बल ६.४ अंशांची नोंद झाली. बुधवारी सकाळपर्यंतच्या २४ तासांमध्ये विदर्भातील अकोला, अमरावती, नागपूर, वर्धा, यवतमाळ, मध्य महाराष्ट्रातील मालेगाव, नाशिक, औरंगाबाद, परभणी येथे थंड दिवस होता. पुढील दोन दिवस मध्य प्रदेश, छत्तीसगडमध्ये, तर आज (ता. ३१) विदर्भात दिवस थंड राहण्याची शक्यता हवामान विभागाने वर्तविली आहे. राज्यातील थंड दिवस असलेली ठिकाणे : कंसात कमाल तापमानात सरासरीच्या तुलनेत झालेली घट : बुलडाणा २२.० (- ६.४)  गोंदिया २२.० (-७.३)  अकोला २६.० (-५.१)  अमरावती २५.४ (- ५.४)  नागपूर २५.२ (- ४.९)   वर्धा २५.० (-५.०)   यवतमाळ २५.० (- ५.२)   मालेगाव २४.८ (- ६.४)  नाशिक २५.३ (- ४.९)  औरंगाबाद २५.४ (- ४.९)  परभणी २७.० (- ४.४).