जळगाव : खानदेशात तुरीची मळणी अनेक भागात सुरू झाली आहे. तुरीला प्रतिक्विंटल ५००० रुपयांपर्यंतचा दर काही ठिकाणी मिळत आहे. काही मोठ्या गावांमध्ये देशी वाणांच्या तुरीला चांगली मागणी आहे. 

तुरीला ५६७५ रुपये प्रतिक्विंटलचा हमीभाव आहे. एवढे दर मिळावेत. तसेच शासनाने तूर खरेदी केंद्र तातडीने सुरू करावेत, अशी मागणी केली जात आहे. 

खानदेशात सुमारे नऊ हजार हेक्‍टरवर तुरीची लागवड विविध तालुक्‍यांमध्ये झाली होती. यात बागायती किंवा सिंचनाची सुविधा असलेल्या तुरीचे क्षेत्र सुमारे चार हजार हेक्‍टरपर्यंत आहे. मुक्ताईनगर, रावेर, चोपडा, शहादा, तळोदा भागात अनेक शेतकरी तुरीची लागवड करतात. ही लागवड यंदा कमी असली तरी उत्पादन बऱ्यापैकी येईल, अशी स्थिती आहे. संकरित तुरीची लागवड अधिक आहे, तर अनेक शेतकऱ्यांनी देशी किंवा पारंपरिक वाणांची लागवड जूनमध्येच केली होती. या तुरीची मळणी काही ठिकाणी सुरू झाली आहे. 

उत्पादकता अजून नेमकेपणाने समोर आलेली नाही. कारण कोरडवाहू तुरीची मळणी जानेवारीच्या मध्यात होईल. ही मळणी शहादा, मुक्ताईनगर व रावेरातील काही भागात झाली आहे; परंतु तुरीचे दर दबावात दिसत आहेत. मागील हंगामात तुरीला ४००० रुपयांपर्यंतचे दर होते. काही ठिकाणी तर ३५०० रुपये प्रतिक्विंटलचा दर होता. यंदा देशी वाणांच्या तुरीला उठाव आहे. पाच हजारांपर्यंतचा दर तूर्ततरी आहे; परंतु पुढे आवक वाढली तर दरांवर दबाव वाढू शकतो. त्यापूर्वीच तुरीच्या शासकीय खरेदीसंबंधी कार्यवाही करावी, अशी मागणी करण्यात येत आहे.