अमरावती  : समृद्धी महामार्गामुळे राज्याच्या आर्थिक विकासात भर पडणार आहे. शेतकऱ्यांनी उत्पादित केलेला शेतीमाल मोठ्या बाजारपेठेत कमी वेळेत पोचविणे यामुळे शक्‍य होईल, असे प्रतिपादन मुख्यमंत्री देवेंद्र फडणवीस यांनी केले. 

बेलोरा विमानतळावरील विस्तारीत सेवांच्या प्रारंभप्रसंगी श्री. फडणवीस बोलत होते. कृषिमंत्री डॉ. अनिल बोंडे,, सामान्य प्रशासन राज्यमंत्री मदन येरावार, गृह राज्यमंत्री डॉ. रणजित पाटील, विदर्भ विकास मंडळाचे उपाध्यक्ष डॉ. सुनील देशमुख, श्रीकांत देशपांडे, जिल्हा परिषद अध्यक्ष नितीन गोंडाणे, महापौर संजय नरवणे, खासदार रामदास तडस, नवनीत राणा, आमदार प्रवीण पोटे, अरुण अडसड, वीरेंद्र जगताप, यशोमती ठाकूर, रवी राणा, रमेश बुंदिले, विभागीय आयुक्‍त पियूष सिंह, जिल्हाधिकारी शैलेश नवाल यावेळी उपस्थित होते.

यावेळी मुख्यमंत्री म्हणाले, की दळणवळणाच्या सुविधा गतिमान होणे काळाची गरज आहे. त्याकरिता सर्वच पर्यायांचा विचार करणे आवश्‍यक आहे. दर्जेदार रस्ते असतील तर शेतीमालासह औद्योगिक उत्पादनांची वाहतूक सुलभ आणि गतीने होईल. असाच गतिमान वाहतुकीचा पर्याय समृद्धी मार्ग उपलब्ध करून देणार आहे. गती वाढणार असल्याने मोठ्या बाजारपेठेपर्यंत पोचण्याचा कालावधी कमी होईल. हा पर्याय शेतकऱ्यांसह ग्रामीण अर्थव्यवस्था बळकटीकरणाला पूरक ठरेल.

बळिराजा अभियानातून राज्यातील सिंचन अनुशेष दूर करण्यासाठी भरीव निधीची तरतूद करण्यात आली आहे. यामुळे येत्या दोन वर्षांत राज्याची सिंचन क्षमता  पूर्णत्वास जाणार आहे. विमानतळ विस्तारीकरणामुळे बेलोरा विमानतळावर मोठ्या आकाराची विमाने उतरण्याची सुविधा निर्माण होणार आहे. औद्योगिक वसाहतीतील भूखंड शिल्लक नसल्यामुळे अतिरिक्त वसाहतीसाठी जमीन अधिग्रहण करावी लागेल. मोठे प्रवासी आणि मालवाहू विमान वाहतुकीमुळे जिल्ह्याच्या औद्योगिक विकासाला गती मिळणार आहे. बेलोरा विमानतळावरुन देशातील चार महत्त्वाच्या शहरासाठी विमानसेवा सुरू करण्यात येईल, असे श्री. फडणवीस यांनी सांगितले.