पुणे ः कोथरूड मतदारसंघातून उमेदवारी जाहीर झालेले भारतीय जनता पक्षाचे प्रदेशाध्यक्ष आणि महसूलमंत्री चंद्रकांत पाटील यांनी आपला उमेदवारी अर्ज गुरुवारी (ता. ३) दाखल केला. सकाळी कोथरूडच्या छत्रपती शिवाजी महाराजांच्या अश्‍वारुढ पुतळ्याला पुष्पहार अर्पण करून पाटील यांची भव्य मिरवणूक काढली होती. या वेळी विद्यमान आमदार मेधा कुलकर्णी यांच्यासह शिवसेनेचे स्थानिक नेते शाम देशपांडे आणि भाजपचे पदाधिकारी मोठ्या संख्येने उपस्थित होते. 

पाटील यांची कोथरूडमधून उमेदवारी जाहीर झाल्यावर विद्यमान आमदार कुलकर्णी नाराज झाल्या होत्या. दरम्यान बुधवारी (ता. २) पक्षाच्या झालेल्या मेळाव्यात त्यांनी नाराजी व्यक्त करीत पाटील यांना सर्वाधिक मतांनी विजयी करणार असल्याचा निर्धार व्यक्त केला. तर शिवसेनेकडून इच्छुक असलेले आणि बंडखोरीचा इशारा दिलेले माजी आमदार चंद्रकांत मोकाटे यांनी अद्याप आपला निर्णय जाहीर केलेला नाही. तर कोथरूडचे शिवसेनेचे ज्येष्ठ नेते आणि माजी मंत्र शशिकांत सुतार हे आज पाटील यांचा उमेदवारी अर्ज दाखल करण्यासाठी अनुपस्थित होते.