पुणे : पूर्वमोसमी पावसाला पोषक हवामान असल्याने राज्यात ढग गोळा होऊ लागेल आहेत. वाढलेली उष्णता आणि अंशत: ढगाळ हवामान यामुळे उकाड्यातही वाढ झाली अाहे. उद्यापासून (ता. ११) राज्यात पावसाची शक्यता वर्तविण्यात आली अाहे. दोन दिवसांपासून वाहणाऱ्या वाऱ्यामुळे घटलेले तापमान पुन्हा वाढणार आहे. विदर्भात उष्णतेची लाट कायम राहणार असल्याचे हवामान विभागाने स्षप्ट केले आहे. उत्तर भारतात असलेल्या धुळीच्या वादळाची स्थिती निवळून गेल्यानंतर उत्तर प्रदेश ते विदर्भापर्यंत असलेला कमी दाबाच पट्टा विरून गेला आहे. या कमी दाबाच्या पट्ट्यामुळे मध्य महाराष्ट्र, मराठवाड्यात वाऱ्यांचा वेग वाढून तापमानात १ ते २ अंशांची घट झाली होती. विदर्भात मात्र तापमानाचा पारा वाढला होता. बुधवारी (ता. ९) सकाळपर्यंतच्या २४ तासांमध्ये विदर्भातील चंद्रपूर येथे राज्यातील उचांकी ४६ अंश सेल्सिअस तापमानाची नोंद झाली. मध्य महाराष्ट्रात तापमानाचा पारा ३२ ते ४२ अंश सेल्सिअस, कोकणात ३३ ते ३४ अंशाच्या आसपास आहे. तर विदर्भात कमी झालेले तापमान पुन्हा वाढू लागले आहे. विदर्भात बहुतांशी ठिकाणी तापमान ४३ अंशांच्या पुढे गेले आहेत. तर मराठवाड्यात तापमान ३९ ते ४३ अंशांच्या जवळपास आहे. बुधवारी (ता. ९) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३७.६, नगर ४३.०, जळगाव ४२.८, कोल्हापूर ३७.५, महाबळेश्वर ३२.२, मालेगाव ४२.२, नाशिक ३८.१, सांगली ३९.०, सातारा ३९.७, सोलापूर ४२.१, मुंबई ३३.५, रत्नागिरी ३४.२, डहाणू ३४.७, आैरंगाबाद ३९.५, परभणी ४३.६, अकोला ४३.०, अमरावती ४२.८, बुलडाणा ३९.८, चंद्रपूर ४६.०, गोंदिया ४२.८, नागपूर ४४.४, वर्धा ४४.०, यवतमाळ ४३.०.