सांगली : म्हैसाळ योजनेतून मागील तीन महिन्यांत पावणेपाच टीएमसी पाणी दुष्काळी सहा तालुक्यांत वितरित करण्यात आले. म्हैसाळ योजनेचे उन्हाळी आवर्तन एक एप्रिल ते आजअखेर जवळपास तीन महिने सुरू आहे. पावसाळा सुरू होण्याच्या तोंडावर आता योजनेचे आवर्तन अंतिम टप्प्यात आहे. येत्या आठवड्याच्या शेवटी योजना बंद होण्याची शक्यता आहे. 

म्हैसाळ योजना मागील तीन महिने मिरज पूर्व, कवठेमहांकाळ, जत, तासगाव या चार तालुक्यांत वरदायिनी ठरली आहे. या चार तालुक्यांत सर्वाधिक पाण्याचे वितरण करण्यात आले. मंगळवेढा भागातही काही ठिकाणी पाण्याची चाचणी घेण्यात आली. पावणेपाच टीएमसीपैकी दीड टीएमसी पाणी टंचाईग्रस्त आणि दुष्काळी भाग म्हणून जिल्हाधिकारी आदेशाने सोडण्यात आले. सुमारे साडेतीन टीएमसी पाणी शेतीसाठी देण्यात आले.

पावणेपाच टीएमसी पाण्याचे सुमारे पंधरा कोटी रुपये वीजबिल होते. यातील ८१-१९ च्या फॉर्म्युला नुसार ३ कोटी रुपये भरावे लागतील. त्यांपैकी जिल्हाधिकारी आदेशाने सोडलेल्या पाण्याचा म्हणून काही वाटा उचलणार आहेत. दुष्काळी भागातील वीजबिल १/३ सवलत म्हणून कमी करण्यात येईल. त्यामुळे पुन्हा हा आकडा कमी होईल. 

म्हैसाळ योजनेच्या पाण्यासाठी गोळा करण्यात आलेली वसुली रक्कम अडीच कोटी रुपये इतकी आहे. सर्व सवलती आणि योजना वजा जाता किमान एक ते दीड कोटी रुपये शेतकऱ्यांच्या अडीच कोटी रुपयांपैकी वीजबिलपोटी भरावे लागतील. त्याशिवाय पुढील आवर्तनास वीज मिळू शकणार नाही. वसूल अडीच कोटी रुपयांपैकी वाट्याला येईल ती रक्कम वीजबिल म्हणून आणि उर्वरित रक्कम पाणीपट्टी म्हणून बाजूला ठेवण्यात येईल. पाणीपट्टी सुमारे अडीच कोटी रुपये होते. कारण अलीकडील शासन निर्णयानुसार ८००० रुपये प्रति १ एमसीएफटी दर आहे, अशी माहिती सूत्रांनी दिली. 

बिळूर भागात पाणी मे महिन्यात जोपर्यंत पाऊस सक्रिय होत नाही. धरणातील पाणीसाठा उपलब्ध आहे, तोपर्यंत योजना सुरू राहील, असे सांगण्यात आले होते. सध्या जत तालुक्यातील बिळूर भागात पाणी वितरित केले जात असल्याचे सूत्रांनी सांगितले.