नाशिक : कांद्यावरील निर्यातबंदी केंद्राकडून उठविण्याची घोषणा झाली असली, तरी निर्यात प्रक्रियेस उशीर होत आहे. कांदा व अन्य शेतमाल कवडीमोल दराने विकला जात आहे. यावर केंद्र सरकारची १५ मार्चपासून कांदा निर्यात सुरळीत होण्याची घोषणा असली तरी वाट न पाहता तातडीने निर्यात सुरू करावी, तसेच कांद्यासह अन्य शेतमालाला हमीभाव द्यावा या मागणीसाठी जिल्हा राष्ट्रवादी काँग्रेसकडून मुंबई-आग्रा महामार्गावर चांदवड येथील चौफुलीवर गुरुवारी (ता. ५) रास्ता रोको करण्यात आला. 

भारतीय कांद्याला केंद्र सरकारचे निर्यातीचे धोरण नसल्याने कांद्याचे भाव घसरले आहेत. अशा परिस्थितीत कांदा उत्पादकांचा उत्पादन खर्च देखील वसूल होत नसल्याचे चित्र आहे. त्यामुळे शेतकरी आत्महत्यांमध्ये वाढ झाली आहे. दुसरीकडे शेतमालाचे दर वाढल्यास बाजारभाव नियंत्रित करण्यासाठी हस्तक्षेप करून दर पाडले जातात, असा आरोप केंद्र सरकारवर यावेळी करण्यात आला. 

कांदा अत्यंत कवडीमोल भावाने विकला जात असल्याने शेतकऱ्यांमध्ये संतापाची लाट आहे. त्यातच बदललेल्या वातावरणाचा फटका उत्पादकांना सहन करावा लागत आहे. त्यामुळे शेतकऱ्यांच्या सहनशीलतेचा अंत न पाहता केंद्रातील भाजप सरकारने तातडीने कांद्यासह सर्व शेतमालाला हमीभाव जाहीर करून दिलासा द्यावा, अन्यथा अधिक तीव्र स्वरूपाचे आंदोलन करण्यात येईल, असा इशाराही राष्ट्रवादी कॉंग्रेसचे जिल्हाध्यक्ष अॅड. रवींद्र पगार यांनी दिला आहे.

रास्ता रोको आंदोलन प्रसंगी मोठ्या प्रमाणात पोलिस फौजफाटा तैनात करून पोलिस वाहने आणून ठेवल्याने तणावपूर्ण वातावरण निर्माण झाले होते. कांद्याच्या माळा गळ्यात घालून आंदोलकांनी केंद्र सरकारच्या विरोधात जोरदार घोषणाबाजी केली. यावेळी जिल्हा परिषदेचे उपाध्यक्ष डॉ. सयाजीराव गायकवाड, युवक जिल्हाध्यक्ष पुरुषोत्तम कडलग यांची भाषणे झाली. यांसह महिला जिल्हाध्यक्ष प्रेरणा बलकवडे, जिल्हा उपाध्यक्ष जगदीश पवार यांसह पदाधिकारी व कार्यकर्ते मोठ्या संख्येने उपस्थित होते.

प्रमुख मागण्या