जळगाव ः शासकीय कापूस खरेदीला खानदेशात मागील २० ते २५ दिवसांपासून ब्रेक लागला आहे. ज्या खरेदी केंद्रांत कापूस साठवणुकीसाठी शेड आहे, तेथेच सुरू आहे. इतरत्र शेडअभावी ही खरेदी बंद असल्याने शेतकऱ्यांचे नुकसान होत आहे. 

जळगाव जिल्ह्यात फक्त जामनेर व पहूर येथे खरेदी सुरू आहे. धरणगाव येथेही पणन महासंघातर्फे खरेदी सुरू आहे.  परंतु, इतरत्र खरेदी बंद आहे. जळगाव, बोदवड, भुसावळ, पाचोरा, एरंडोल, भडगाव, धुळे, नंदुरबार, शहादा,  रावेर येथे खरेदी बंद असल्याने संबंधित भागातील किंवा बाजार समितीच्या कार्यक्षेत्रातील शेतकऱ्यांना कापसाची विक्री कुठे करायची? हा प्रश्‍न आहे. 

शासकीय कापूस खरेदी बंद असल्याने बाजारात दर कमी आहेत. सध्या ४००० रुपये प्रतिक्विंटलपर्यंत कापसाची खरेदी जिनींग प्रेसिंग कारखाने व खेडा खरेदीमध्ये केली जात आहे. जळगाव व इतर भागात मध्यंतरी खरेदीसाठी आणखी नव्या केंद्रांची किंवा कारखान्यांची संख्या वाढविण्याची मागणी केली जात होती. कारण, यंत्रणेवरचा ताण वाढत होता. हा ताण वाढलेला असतानाच पावसाळा सुरू झाला आणि जेथे खरेदी केंद्र नियुक्त केले होते. त्या जिनींग, प्रेसिंग कारखान्यांमध्ये पावसाळ्यात कापूस ओला होवून नुकसान टाळण्यासाठी साठवणुकीसंबंधीचे शेड नसल्याने खरेदी बंद झाली.

आठ लाख क्विंटल कापूस शिल्लक

सध्या पाचोरा, जामनेर, जळगाव, चोपडा, यावल या भागात मिळून सुमारे आठ लाख क्विंटल कापूस शेतकऱ्यांकडे शिल्लक आहे. कापसाची खरेदी करण्याची मागणी शेतकरी करीत आहेत. परंतु, खरेदी केंद्रधारक कारखानदार कापूस ओला होईल, नुकसान टाळता येणार नाही, असा मुद्दा उपस्थित करून खरेदीस नकार देत आहेत, अशी स्थिती खानदेशात आहे.