सेनगाव, जि. हिंगोली : तालुक्यात गेल्या काही दिवसांत झालेल्या जोरदार पावसामुळे सोयाबीन, कपाशी, तूर आदी खरीप पिकांचे मोठे नुकसान झाले. परंतु, संबंधित यंत्रणांकडून पीक नुकसानीचे पंचनामे करण्यास दिरंगाई करण्यात आली. यामुळे संतप्त झालेल्या ताकतोडा (ता. सेनगाव) येथील शेतकऱ्यांनी शेतामध्ये काळे झेंडे लावून निषेध केला.

ऑक्टोबर महिन्यात तालुक्यात जोरदार पाऊस झाला. त्यामुळे काढणीस आलेले सोयाबीन, कापूस, झेंडू आदी पिकांचे खूप नुकसान झाले. नुकसानीचे पंचनामे करण्याचे आदेश दिल्यानंतरही महसूल, कृषी, ग्रामविकास विभागाचे कर्मचारी पंचनामे करण्यास आले नाहीत. त्यामुळे शेतकऱ्यांनी नुकसानग्रस्त पिकांमध्ये काळे झेंडे लावून प्रशासनाच्या दिरंगाईचा निषेध केला. 

नामदेव पतंगे, दशरथ सावके, कैलास सावके, गणेश सावके, राजेश सावके आदी शेतकरी उपस्थित होते. या वेळी तत्काळ पंचनामे करून शेतकऱ्यांना मदत देण्याची मागणी करण्यात आली.