अमरावती : भाडेतत्त्वावरील शेतीत कारली लागवड करीत, उत्पादित कारल्याची थेट आखाती देशात निर्यात करण्यात आली. इच्छा तिथे मार्ग असतो, हे रितेश पोटे या युवा शेतकऱ्याने आपल्या कृतिशिलतेतून सिद्ध केले. त्यांच्या प्रयोगशीलतेचे अनुकरण करून इतरांनी आर्थिक उत्कर्ष साधावा, असे प्रतिपादन जिल्हाधिकारी अभिजीत बांगर यांनी केले.

अचलपूर येथील प्रयोगशील शेतकरी रितेश पोटे यांनी गेल्या अनेक वर्षांपासून भाडेतत्त्वावरील शेतीत व्यवसायिक पिकाचा प्रयोग यशस्वी केला आहे. १० ते १५ एकरावर ते कारली लागवड करतात. अशाप्रकारच्या शेतीपद्धतीत जोखीम असली तरी मागणी असली तर एकाचवेळी मोठा फायदा अशाप्रकारची पीकपद्धती मिळवून देते, असा त्यांचा गेल्या काही वर्षातील अनुभव आहे.

त्यामुळेच यावर्षी त्यांनी पंधरा एकर शेती भाडेतत्त्वावर घेतली. मल्‍चिंगवर बियाणे लागवड करण्यात आली. अवघ्या दीड ते पावणेदोन महिन्यात कारली तोडणीस आली आहेत. कारल्यासाठी दुबई येथे निर्यातीचा करार करण्यात आला. तोडणीनंतर कारल्याची पहिली खेप दुबईकडे रवाना झाली. अमरावती विभागीय आयुक्‍त पियुष सिंह  या वेळी उपस्थित होते.