नागपूर  :  पेंच प्रकल्पामुळे उद्‌भवलेला पिकाच्या पाणी प्रश्‍नामुळे जिल्ह्यात यावर्षीच्या रब्बी हंगामात गहू लागवड क्षेत्रात थोडीथोडकी नव्हे तर तब्बल आठ हजार हेक्‍टरने घट नोंदविण्यात आली आहे. यावर्षी कमी झालेले पर्जन्यमान परिणामी पुरेशी ओल नसणे आणि सिंचनासाठी पाण्याच्या उपलब्धतेची अडचण अशी अनेक कारणे यामागे दिली जात आहेत.

जिल्ह्याचे रब्बी पेरणीचे सर्वसाधारण क्षेत्र १ लाख ६२ हजार ५७२ हेक्‍टर इतके आहे. यावर्षी एक लाख ६७ हजार ८१६ हेक्‍टरवर पेरणी झाली आहे. सरासरीच्या १०३ टक्‍के क्षेत्रावर पिकांची लागवड झाली आहे. परंतु यावर्षीच्या रब्बी हंगामात पाण्याच्या उपलब्धतेचे मोठे आव्हान शेतकऱ्यांसमोर निर्माण झाले. परिणामी यावर्षी शेतकऱ्यांनी गव्हाऐवजी हरभरा लागवडीवर भर दिला.

गेल्या वर्षी २०१५-१६ च्या रब्बी हंगामात ८४ हजार ५२२ हेक्‍टरवर गहू लागवड होती. यावर्षी त्यात आठ हजार हेक्‍टरची घट होत हे क्षेत्र ७५ हजार ३०२ वर आले आहे. याउलट गेल्या वर्षी अवघ्या ७८ हजार हेक्‍टरवर असलेल्या हरभरा क्षेत्रात चार हजार हेक्‍टरची वाढ नोंदविली गेली आहे. मिरची व भाजीपाल्यासारख्या नगदी पिकांवरदेखील शेतकऱ्यांनी यावर्षी भर दिल्याचे चित्र आहे. गव्हाखालील कमी झालेले काही क्षेत्र या पिकाखाली आल्याचे कृषी विभागाच्या सूत्रांकडून सांगण्यात आले.