सोलापूर : जिल्ह्यासाठी २०२०-२१ या आर्थिक वर्षासाठी ३४९.८७ कोटी रुपयांच्या प्रारूप आराखड्यास रविवारी (ता. २६) मान्यता देण्यात आली.

जिल्हा नियोजन समितीची नियोजन भवन येथे पालकमंत्री दिलीप वळसे-पाटील यांच्या अध्यक्षतेखाली बैठक झाली. या बैठकीत या प्रारूप आराखड्यास मान्यता देण्यात आली. जिल्हा परिषदेचे अध्यक्ष अनिरुद्ध कांबळे, खासदार जयसिद्धेश्वर स्वामी, ओमराजे निंबाळकर, जिल्हाधिकारी मिलिंद शंभरकर, जिल्हा परिषदेचे मुख्य कार्यकारी अधिकारी प्रकाश वायचळ, महापालिका आयुक्त दीपक दराडे, पोलिस अधीक्षक मनोज पाटील, जिल्हा नियोजन अधिकारी सर्जेराव दराडे उपस्थित होते.

२०२०-२१ मधील सर्वसाधारण वार्षिक योजनेसाठी यंत्रणांनी ६६७.२७ कोटी रुपयांची मागणी केली होती. मात्र नियोजन समितीने ३४९.८७ कोटी रुपयांच्या आराखड्यास मान्यता दिली. जिल्ह्याच्या प्राधान्याच्या योजना लक्षात घेऊन योजनेसाठी ११६ कोटी रुपयांची अतिरिक्त मागणी केली जाईल, असे वळसे-पाटील यांनी सांगितले. 

सुरुवातीस मांडलेल्या सर्व विषयांना या वेळी मान्यता देण्यात आली. शंभरकर यांनी २०१९-२० मधील खर्चाचा आढावा घेतला. जिल्हा वार्षिक योजनेतील सर्वसाधारण अनुसूचित जातीसाठी ११.४६ कोटी व आदिवासी क्षेत्राबाहेरील उपाययोजनेसाठी २६ लाख रुपयांच्या पुनर्विनियोजन प्रस्तावास मान्यता देण्यात आली.

आमदार बबनराव शिंदे, भारत भालके, प्रणिती शिंदे, संजय शिंदे, राजेंद्र राऊत, राम सातपुते, यशवंत माने, सचिन कल्याणशेट्टी, रामहरी रूपनवर, प्रशांत परिचारक, जिल्हा परिषद सदस्य बळिराम साठे, उमेश पाटील, सुभाष माने, नगरसेवक आनंद चंदनशिवे उपस्थित होते.

तीन देवस्थानांना तीर्थक्षेत्राचा ‘क’ वर्ग दर्जा

माळशिरस तालुक्यातील कचरेवाडी येथील तुळजाभवानी देवस्थान, उत्तर सोलापूर तालुक्यातील रानमसले येथील श्री क्षेत्र महिबूब सुबानीबाबा देवस्थान आणि बार्शी येथील भगवंत मंदिरास ‘क’ वर्ग तीर्थक्षेत्र म्हणून मान्यता देण्यात आली.