वाशीम : येत्या डिसेंबरमध्ये होऊ घातलेल्या वाशीम जिल्हा परिषद, तसेच जिल्ह्यातील सहा पंचायत समित्यांच्या निवडणुकीच्या अनुषंगाने जिल्हाधिकाऱ्यांनी पाठविलेल्या प्रारूप मतदारसंघ रचनेच्या प्रस्तावाला अमरावती विभागीय आयुक्तांनी मंजुरी दिली आहे. आता सोमवारी (ता. २७) गट व गणांची आरक्षण सोडत काढली जाणार असून, याकडे राजकारण्यांचे लक्ष लागले आहे. 

मुदत संपल्याने येत्या डिसेंबरमध्ये जिल्हा परिषद, पंचायत समिती निवडणूक होत आहे. यासाठी प्रशासनाकडून तयारी सुरू झाली आहे. येथील जिल्हाधिकाऱ्यांनी तयार केलेल्या प्रारूप मतदारसंघ रचनेच्या प्रस्तावाला विभागीय आयुक्तांनी मंजुरी दिली आहे.  डिसेंबर महिन्यात विद्यमान सदस्यांचा पाच वर्षांचा कार्यकाळ संपत आहे. आगामी निवडणुकीच्या दृष्टिकोनातून निवडणूक आयोगाने पूर्वतयारी सुरू केली आहे. ही निवडणूक सन २०११ च्या जनगणनेच्या अनुषंगाने होत असून, वाशीम तालुक्यात जिल्हा परिषदेचा एक मतदारसंघ वाढला आहे. पूर्वीच्या नऊ मतदारसंघांपैकी एक आणि दोन गावे वगळून दहाव्या नवीन मतदारसंघाची रचना करण्यात आली आहे.  काही जिल्हा परिषद मतदारसंघाची नावे कायम असून, दहावा नवीन मतदारसंघ तयार करण्यात आला. 

लोकसंख्या व चक्रानुक्रमानुसार एससी, एसटी प्रवर्गाच्या आरक्षणासह जिल्हा परिषद व पंचायत समिती मतदारसंघ रचनेचा प्रस्ताव प्रशासनाने १० आॅगस्टला अमरावती विभागीय आयुक्तांकडे सादर केला होता. त्याला नुकतीच विभागीय आयुक्तांनी मंजुरी दिली आहे.