अमरावती : कोरोना विषाणूंचा प्रादुर्भाव रोखण्यासाठी शासनपातळीवर उपायांवर भर दिला गेला आहे. त्यात खारीचा वाटा उचलत जिल्हा परिषद पदाधिकारी व काही सदस्यांनी दोन महिन्यांचे मानधन मुख्यमंत्री सहाय्यता निधीला देण्याचा निर्णय घेतला आहे. 

‘कोरोना’चा प्रादुर्भाव रोखण्यासाठी शासनाने २१ दिवसांचे लॉकडाऊन जाहीर केले आहे. त्यासोबतच केंद्र सरकार, राज्य सरकारच्या पातळीवर वैद्यकीय सुविधांच्या उभारणीसाठी मदतीचे आवाहन देखील केले गेले आहे.

जिल्हा परिषदेचे अध्यक्ष बबलू देशमुख, उपाध्यक्ष विठ्ठल चव्हाण, बांधकाम व शिक्षण समिती सभापती प्रियंका दगडकर, आरोग्य व वित्त सभापती बाळसाहेब हिंगणीकर, समाज कल्याण सभापती दयाराम काळे, महिला व बालकल्याण सभापती पूजा आमले यांच्यासह ज्येष्ठ महिला सदस्य सुहासिनी ढेपे यांनी आपले दोन महिन्यांचे मानधन मुख्यमंत्री सहाय्यता निधीत देण्याचा निर्णय घेतला आहे. या आशयाचे पत्र त्यांनी मुख्य कार्यकारी अधिकारी अमोल येडगे यांना दिले. 

विरोधी पक्षनेते रवींद्र मुंदे यांनीही आपले दोन महिन्यांचे मानधन देण्याचा निर्णय घेतला आहे. पदाधिकाऱ्यांनी मदत करण्याचा निर्णय घेतल्याबद्दल सर्वच स्तरातून त्यांचे कौतूक होत आहे. सामाजिक कार्यकर्त्यांनी देखील शासनाला आर्थिक मदत करावी, असे आवाहन बबलू देशमुख यांनी केले.