अमरावती : दुष्काळी निकषानुसार दुसरे ट्रिगर (कळ) लागलेल्या पाच तालुक्‍यांत रॅण्डम पद्धतीने निर्देशांक निश्चित करण्यात आला. त्याआधारे दोन लाख १५ हजार ९२२ हेक्‍टरवरील पिके बाधित झाल्याचा अहवाल शासनाला सादर करण्यात आला आहे.

जिल्ह्यात पाच तालुक्‍यांत दुष्काळ जाहीर करण्यात आला होता. त्यातील दुसऱ्या ट्रिगरनुसार संयुक्‍त सर्वेक्षण झाले. याआधारे मोर्शी तालुक्‍यात गंभीर स्वरूपाचा, तर अचलपूर, चिखलदरा, वरुड व अंजनगावसूर्जी तालुक्‍यात मध्यम स्वरूपाचा दुष्काळ असल्याचे संयुक्‍त स्वाक्षरी अहवालात नमूद करण्यात आले आहे.

शासनाने दुष्काळ जाहीर करण्यासाठी शास्त्रीय निकष व सुधारित कार्यपद्धती मागील वर्षी निश्चित केली आहे. त्यानुसार जिल्ह्यातील दुष्काळी परिस्थितीचे मूल्यांकन करण्यासाठी महामदत ही संगणक प्रणाली विकसित करण्यात आली. त्याआधारे ट्रिगर एक लागलेले सहा तालुके निश्चित करण्यात आले. या तालुक्‍यातील प्रभावदर्शक निर्देशांकाचे मूल्यांकन करण्यात आल्यानंतर पाच तालुक्‍यांमध्ये ट्रिगर २ लागू करण्यात आला आहे.

या तालुक्‍यातील दहा टक्‍के गावे रॅंडम पद्धतीने निवडून त्या गावात ग्राउंड ट्रस्टिंग रिपोर्ट शासनाला सादर करण्यात आला. यामध्ये पाच तालुक्‍यात ३३ टक्‍क्‍यांपेक्षा जास्त नुकसान आढळून आल्यामुळे या पाच तालुक्‍यात दुष्काळाची स्थिती स्पष्ट करण्यात आली.