नांदेड : चालू आर्थिक वर्षाच्या (२०१९-२०) पहिल्या साडेचार महिन्यांमध्ये जिल्ह्यातील ७३ हजार ६३२ शेतकऱ्यांना ४३४ कोटी ६० लाख रुपये (२२.०९ टक्के) पीक कर्जवाटप करण्यात आले. राष्ट्रीयकृत बॅंकांनी अद्याप पीक कर्जवाटपाच्या कामात वेग घेतलेला नाही. जिल्हा बॅंकेने उद्दिष्टपार कर्जवाटप केले आहे. परंतु, ग्रामीण आणि खासगी बॅंकांनी उद्दिष्टाच्या निम्मेदेखील कर्जवाटप केले नसल्याची स्थिती आहे.

खरीप हंगाम २०१९-२० मध्ये जिल्ह्यातील बॅंकांना १ हजार ९६७ कोटी ५१ हजार रुपये एवढे पीक कर्जवाटपाचे उद्दिष्ट देण्यात आले. गुरुवार (ता. १५) पर्यंत राष्ट्रीयकृत बॅंकांनी १ हजार ३६० कोटी ७ लाख रुपये उद्दिष्ट असताना १० हजार ९४२ शेतकऱ्यांना १०४ कोटी २३ लाख रुपये (७.६६ टक्के) कर्जवाटप केले.

खासगी क्षेत्रातील बॅंकानी १५१ कोटी ६७ लाख रुपयांच्या उद्दिष्टापैकी ३ हजार ४२० शेतकऱ्यांना ६३ कोटी १७ लाख रुपये (४१.६३ टक्के) पीक कर्जवाटप केले. महाराष्ट्र ग्रामीण बॅंकेने २७७ कोटी १७ लाखांपैकी ८ हजार ४९२ शेतकऱ्यांना ५९ कोटी ९२ लाख रुपये (२१.५८ टक्के), जिल्हा मध्यवर्ती सहकारी बॅंकेने १७८ कोटी ६० लाखांपैकी ५० हजार ७७८ शेतकऱ्यांना २०७ कोटी ३८ लाख (११६.११टक्के) पीककर्ज वाटप केले.

राष्ट्रीयकृत बॅंकांनी पीक कर्जवाटपात अद्याप हात मोकळा सोडलेला नाही. त्यामुळे या बॅंकांची पीक कर्जवाटपाची उद्दिष्टपूर्ती खूप दूर आहे. ग्रामीण बॅंक, खासगी बॅंकांचे कर्जवाटप उद्दिष्टाच्या निम्म्याहून कमी आहे. जिल्हा मध्यवर्ती सहकारी बॅंक पीक कर्जवाटपात आघाडीवर आहे.

पीक कर्जवाटप स्थिती (कोटी रुपये)