अकोला : जुलै महिन्यात पडलेला पाऊस थांबताच अकोट तालुक्यात सातपुड्याच्या पायथ्याशी असलेल्या आकोलखेड-आंबोडा शिवारातील कपाशीचे उभे पीक सुकण्यास सुरवात झाली. अनेकांच्या कापूस पिकात ही समस्या उदभवली असून, शेतकरी हवालदिल झाला आहे. शासकीय यंत्रणा व तज्ज्ञ सध्या बोंड अळीच्या विषयातच व्यग्र असल्याने अद्यापही शासकीय तज्ज्ञांचे पथक या भागात पोचले नसल्याची माहिती शेतकऱ्यांनी दिली. परिणामी, पीक सुकण्यामागील नेमकी कारणे काय आहेत, याबाबत निदान होऊ शकलेले नाही.

 जुलै महिन्यात पाऊस थांबल्यानंतर आकोलखेड-आंबोडा शिवारात कपाशीच्या पिकात झाडे वाळत असल्याच्या तक्रारी येऊ लागल्या. घनश्याम बिजणे, कैलास पाटील, नारायण बायवार, सुभाष बिजणे, विष्णू धुवे, गजानन बायवार, नारायण मुंडोकार, अशोक धुवे, देविदास जांभळे, गजानन सावरकर, रितेश जांभळे, धनंजय देशमुख, विनय देशपांडे यांच्यासह इतरांच्या शेतातील कपाशीचे पीक सुकले. याबाबतची माहिती मिळाल्यानंतर तलाठी, कृषी सहायक; तसेच पंचायत समिती कृषी अधिकाऱ्यांनी पाहणी केली. अद्यापही विद्यपीठातील तज्ज्ञ शेतांमध्ये पोचले नसल्याने पीक सुकण्यामागील नेमके शास्त्रीय कारण काय आहे, त्यावर काय उपाययोजना केली पाहिजे, याबाबत शेतकरी अनभिज्ञ आहेत.

या शेतकऱ्यांनी जिल्हाधिकाऱ्यांना निवेदन देऊन तज्ज्ञांचे पथक पाठवण्याबाबत व तातडीने मार्गदर्शन करण्याबाबत मागणी केली; परंतु आठवडा उलटला तरी तिकडे कुणी फारसे गांभीर्याने लक्ष दिलेले नसल्याचे शेतकरी सांगत आहेत. रोग समजून काही शेतकऱ्यांनी बुरशीनाशकाची फवारणी, ड्रेंचिगही केले. परंतु याचा फारसा फायदा झालेला नाही.