सातारा  ः राज्यात उसाच्या वाढलेल्या क्षेत्रामुळे गतवर्षीच्या तुलनेत सुमारे ५ कोटी ५७ लाख ५७ हजार टन उसाचे, तर ६ कोटी २२ लाख क्विंटलने साखर उत्पादन वाढले आहे. राज्यात मंगळवारअखेर (ता. १०) नऊ कोटी ३० लाख टन उसाचे गाळप झाले असून, त्यातून १० कोटी ४१ लाख क्विंटल साखरेचे उत्पादन झाले आहे. 

राज्यात इतर पिकांच्या तुलनेत ऊसाला शाश्‍वत दर मिळत असल्याने राज्यात मोठ्या प्रमाणात उसाचे क्षेत्र वाढले आहे. परिणामी, राज्यात ऊस गाळपासह साखरेच्या उत्पादनही दुपटीपेक्षा जास्त वाढले आहे. यंदा राज्यातील १८७ कारखान्यांनी गाळप सुरू केले होते. या कारखान्यांच्या नऊ कोटी ३० लाख मेट्रिक टन उसाचे गाळप झाले असून, त्यातून १० कोटी ४१ लाख क्विंटल साखरेचे उत्पादन घेतले आहे.

गतवर्षी १० एप्रिलअखेर ३ कोटी ७२ लाख मेट्रिक टन ऊस गाळपाद्वारे ४ कोटी १८ लाख क्विंटल साखरेचे उत्पादन झाले आहे. गतवर्षीच्या तुलनेत या वर्षी ५ कोटी ५७ लाख मेट्रिक टन उसाचे अधिक गाळप झाले, तर ६ कोटी २२ लाख क्विंटल साखर उत्पादनात वाढ झाली आहे. सर्वांत जास्त साखर उतारा कोल्हापूर विभागात १२.४२ टक्के, तर सर्वांत कमी औरंगाबाद विभागात ९.९२ टक्के मिळाला आहे. राज्यात हंगाम सुरू केलेल्या १८७ पैकी १२६ कारखान्यांच्या हंगामाची सांगता झाली आहे.

अजूनही मोठ्या प्रमाणात ऊस शिल्लक असल्याने या हंगामाचे दिवस लांबणार असून, ६१ कारखान्यांचा गाळप सुरू असून, यातील अनेक कारखान्यांच्या हंगाम एप्रिलअखेरपर्यंत चालणार असल्याचे सांगितले जात आहे. 

साखरेच्या दरावर परिणाम  गतवर्षीच्या तुलनेत साखर उत्पादनातील आकडे वाढले आहेत. याचा परिणाम साखरेच्या दरावर होणार आहे. साखरेच्या दरातील घसरणीमुळे जाहीर केलेल्या हप्ताच्या रकमेत कपात केली जात आहे.