परभणी ः गंगाखेड तालुक्यातील गुंजेगाव आणि राणीसावगरगाव मंडळामध्ये गतवर्षीच्या खरीप हंगामातील पिकांचा विमा परतावा संपूर्ण जोखीमेसह मंजूर करण्यात यावा, या मागणीसाठी शेतकऱ्यांनी बुधवारी (ता. ३०) जिल्हाधिकारी कार्यालयासमोर बेमुदत उपोषण सुरू केले आहे.

गतवर्षी कमी पावसामुळे गंगाखेड तालुक्यातील गुंजेगाव, राणीसावरगाव मंडळातील शेतकऱ्यांचा खरीप हंगाम वाया गेला. सर्वच पिकांच्या उत्पादनात मोठी घट आली. पीकविमा योजनेत सहभागी शेतकऱ्यांना विमा कंपनीने तुटपुंजा विमा परतावा मंजूर केला. विमा संपूर्ण जोखीमेसह मंजूर करण्यात यावा या मागणीसाठी बालासाहेब मोटे, सदाशिव इमडे, अंगद मोटे, अनिरुद्ध मोटे आदी शेतकऱ्यांनी बेमुदत उपोषण सुरू केले आहे.