भंडारा  ः लोकसभेची पोटनिवडणूक येत्या २८ मे रोजी होत आहे. त्याकरिता भाजपच्या वतीने पूर्ण तयारी झाली असून, सोमवारी (ता. ७) पक्षाचा उमेदवार जाहीर होईल, अशी माहिती ऊर्जामंत्री तसेच भंडाऱ्याचे पालकमंत्री चंद्रशेखर बावनकुळे यांनी पत्रकार परिषदेत दिली. 

बावनकुळे म्हणाले, प्रशासकीय अनुभव असलेल्या उमेदवाराला प्राधान्य देण्याचे धोरण ठरविले आहे. त्याचा शोध अंतिम टप्प्यात असून, सात मे रोजी त्याविषयीची अधिकृत घोषणा होईल. त्यानंतर ९ मे रोजी भाजपचा उमेदवार नामांकन अर्ज दाखल करणार आहे.

भाजप उमेदवाराच्या प्रचारासाठी केंद्रीय मंत्री नितीन गडकरी यांच्यासह मुख्यमंत्री देवेंद्र फडणवीस यांच्या दोन सभा होतील. पालकमंत्री या नात्याने भंडारा-गोंदिया लोकसभा क्षेत्रात ५० सभा घेणार असल्याचे त्यांनी सांगितले. माजी खासदार नाना पटोले यांनी दिलेला राजीनामा हा दुर्देवी आहे. मागील साडेतीन वर्षांत विकासाचे कोणतेही काम त्यांनी केले नाही. याउलट राजीनामा देऊन जनतेचा विश्‍वासघात केला. 

शिवसेनेशी युतीचा निर्णय पक्षश्रेष्ठींचा पोटनिवडणुकीत शिवसेनेशी युतीचा अंतिम निर्णय पक्षश्रेष्ठी घेणार आहेत. त्या पातळीवर तशी चर्चा सुरू असून, अंतिम निर्णय प्रदेशाध्यक्ष घेतील, अशी माहिती मंत्री चंद्रशेखर बावनकुळे यांनी दिली.