परभणी (प्रतिनिधी)ः जनुकीयरित्या परावर्तित (जीएम) विविध पिकांच्या बियाणे चाचण्यांसाठी परवानगी देण्यात यावी, या मागणीसाठी स्वाभिमानी शेतकरी संघटनेतर्फे शनिवारी (ता.३१) जिल्हाधिकारी कार्यालयासमोर एकदिवसीय उपोषण करण्यात आले.

अनेक देशांतील शेतकरी जिनेटीकली माॅडीफाइड पिकांची लागवड करून फवारणी; तसेच आंतरमशागतीवरील खर्च कमी करून चौपट उत्पादन घेत आहेत. गेल्या काही वर्षांपासून कपाशीचे बीजी १, बीजी २ वाण बोंड अळीला रोखू शकत नाहीत. जगातील अनेक देश सोयाबीन, हरभरा, मका, मोहरी, वांगे आदी पिकांच्या जीएम वाणांची लागवड करून उत्पादन घेत आहेत. कीड, रोग, तणप्रतिबंधक आदी एकूण ७ प्रकारच्या घटकांसाठी विकसित केलेले जीएम बियाणे वापरले जात आहे.

भारतीय शेतकरी मात्र या तंत्रज्ञानापासून वंचित राहत आहेत. २०१४ मध्ये जनुकीय परावर्तित मकाच्या चाचण्या वसंतराव नाईक मराठवाडा कृषी विद्यापीठामध्ये घेण्यात आल्या. त्याचप्रमाणे इतर पिकांच्या जी. एम. वाणांच्या चाचण्यांसाठी परवानगी देण्यात यावी, अशी मागणी स्वाभिमानी शेतकरी संघटनेच्या महिला आघाडीच्या प्रदेशाध्यक्षा रसिका ढगे, जिल्हाध्यक्ष भास्कर खटिंग, किशोर ढगे, केशव आरमळ, डिंगाबर पवार, शेख जाफर, माउली कदम, सय्यद कलिम, आदींनी मागणी केली आहे.