शिरूर, जि. पुणे  ः वाफसा उडून गेल्यावर पेरणी करायची, असला धंदा राज्यकर्त्यांचा चालू आहे. भाजप व शिवसेना एकाच माळेचे मणी असून, जनतेला वेड्यात काढून छुप्या युतीतून त्यांचा भुलभुलय्या चालू आहे, अशी टीका माजी उपमुख्यमंत्री अजित पवार यांनी केला. तसेच फसवणूक व लुबाडणूक करणारे पुन्हा येतील; पण त्यांना आता भुलू नका, असे आवाहनही त्यांनी केले. 

राष्ट्रवादी काँग्रेसच्या ‘हल्लाबोल’ आंदोलनाची पुणे जिल्ह्यातील पहिली जाहीर सभा मंगळावारी (ता. १०) येथील पाबळ फाटा मैदानावर झाली. या वेळी अजित पवार यांनी केंद्र व राज्य सरकारच्या कामगिरीवर कडाडून टीका केली. ते म्हणाले, ‘पुणे जिल्ह्यातील अनेक भागात वाहतुकीचे तीनतेरा वाजलेत. पुणे-शिरूर रस्त्यावरील वाहतूक नियोजन कोलमडले आहे. कायदा-सुव्यवस्थेचा बोजवारा उडाला आहे. दिवसाढवळ्या खून होत आहेत. 

भ्रष्टाचाराने बरबटलेली बरीच मंडळी शासनात जाऊन बसल्याने राज्याचे वाटोळे चालले आहे. नाकर्ते लोक व चुकीच्या प्रवृत्ती शासनात आल्यावर काय होते, हे सर्व जनता पाहात आहे. आम्ही १५ वर्षे राज्य चालवले; पण कुठल्याही घटकाला काहीही कमी पडू दिले नाही. आम्ही सुरळीत बसविलेली राज्याची घडी पार विस्कटून टाकल्याचे श्री. पवार म्हणाले.’

तत्पूर्वी न्हावरे फाटा येथे अजित पवार यांच्यासह डी. पी. त्रिपाठी, धनंजय मुंडे, दिलीप वळसे पाटील, चित्रा वाघ, खासदार सुप्रिया सुळे या नेत्यांनी  मोटारसायकल रॅली काढली.