पुणे : कृषी व्यवसाय व्यवस्थापनेतील पदव्युत्तर पदविका घेऊन तुम्ही आज बाहेर पडत आहात. जगात अनेक समस्या असल्या तरी तुमची देशाला आणि कृषी क्षेत्राला गरज आहे. शेतकऱ्यांबाबत आस्था आणि मानवतेला सर्वोच्च स्थान देऊन तुमचे 'करिअर' घडवा, असे आवाहन भारतीय कृषी संशोधन परिषदेचे महासंचालक डॉ. त्रिलोचन महापात्रा यांनी केले. 

वैकुंठ मेहता राष्ट्रीय सहकारी व्यवस्थापन संस्थेत (वॅमनीकॉम) कृषी व्यवसाय व्यवस्थापन शिक्षण पूर्ण केलेल्या विद्यार्थ्यांच्या दीक्षान्त सोहळ्यात प्रमुख पाहुणे म्हणून ते बोलत होते. केंद्रीय कृषी मंत्रालयाच्या अतिरिक्त सचिव श्रीमती उपमा श्रीवास्तव, राष्ट्रीय मध्यवर्ती सहकारी प्रशिक्षण केंद्राचे सचिव मोहन मिश्रा, वॅमनीकॉमचे संचालक डॉ. के. के. त्रिपाठी, निबंधक एस. वाय. देशपांडे यावेळी उपस्थित होते.  

"कृषीच्या विद्यार्थ्यांनी हे सतत लक्षात ठेवावे की केवळ सुखसुविधा मिळणार नसून कष्टाने आपल्याला देश आणि संस्कृतीची सेवा करण्याची संधी मिळणार आहे. पैसा कमविणे हे आपल्या आयुष्याचे ध्येय असले तरी करियरमध्ये शेतकरी आणि समाज यांना स्थान देत आदर्श समाजासाठी प्रयत्न करावेत, असे डॉ. महापात्रा म्हणाले. कृषी शिक्षणातून आपण सामाजिक सेवेकडे आलो आहोत याची जाणीव ठेवत आपले ध्येय निश्चित करण्याचा आग्रह डॉ. महापात्रा यांनी धरला. 

यावेळी डॉ. महापात्रा यांनी पदविका प्रदान केली. तसेच, पॉल जोसे याला सुवर्ण आणि नवीन कुमार सिंग या विद्यार्थ्याला रौप्यपदक देऊन सन्मान केला.