श्रीरामपूर, जि. यवतमाळ :  कर्जमाफीसाठी ऑनलाइन अर्ज भरताना ‘थम्ब’ आधारशी जुळत नसल्यामुळे आपलं सरकार सेवा केंद्रातून अनेक शेतकऱ्यांना आल्या पावली परत जावे लागत आहे. आधारमधील चुकांची दुरुस्ती करण्यासाठी त्यांची गर्दी आता आधार केंद्रावर उसळली असून, आधार अपडेट १५ सप्टेंबरपर्यंत न झाल्यास ३० टक्के शेतकरी कर्जमाफीपासून वंचित राहण्याची भीती वर्तविली जात आहे. त्यामुळे कर्जमाफीचा अर्ज भरण्याची मुदत वाढविण्याची मागणी शेतकऱ्यांमधून करण्यात येत आहे.

छत्रपती शिवाजी महाराज सन्मान योजनेअंतर्गत शेतकऱ्यांना कर्जमाफीसाठी ऑनलाइन अर्ज भरणे अनिवार्य केले. मात्र कर्जमाफीचा अर्ज भरताना अनेकांचे थम्ब मॅच होत नाहीत. त्यामुळे शेतकऱ्यांना आपले आधार अपडेट करण्याच्या सूचना सेवा केंद्रचालकांनी दिल्या आहेत.

आधारशिवाय शेतकऱ्यांना ड्रायव्हिंग लायसन्स, मतदान कार्ड, पॅन कार्ड, रेशन कार्ड यांच्या मदतीनेसुद्धा कर्जमाफी अर्ज भरता येऊ शकतो. परंतु योग्य त्या गतीने सर्व्हर चालत नसल्याने सेवा केंद्र चालविणाऱ्यांनी आधारची सक्ती केली असल्याची माहिती मिळाली आहे.

आधार काढताना अंगठ्याचे ठसे व डोळ्याच्या बुबुळाचे स्कॅनिंग व्यवस्थित झाले नसल्यामुळे असे होत असावे असा अंदाज आहे. आता आधारमधील चुकांची दुरुस्ती करण्यासाठी शेतकऱ्यांना ३० ते ३५ किमी अंतरावरून पायपीट करत शहरात यावे लागत आहे.

पुसद येथे  वडगाव, ब्राह्मणगाव, कुंभारी, सेलू, मुंगशी, मांजरजवळा, मांडवा, बेलोरा, निंबी, पार्डी तसेच महागाव तालुक्‍यातील काळी इ. गावांचे शेतकरी आधार केंद्रांवर ताटकळत बसून होते. आतापर्यंत जवळपास ५००० शेतकऱ्यांनी आधार केंद्रांवर अपडेट करण्यासाठीची चौकशी केली असल्याची माहिती माउली सर्व्हिसेसचे संचालक निखिल गादेवार यांनी दिली.

आधारच्या एका केंद्रावरून केवळ ४० ते ५० जणांचेच आधार अपडेटला पाठविले जात आहेत. हजारो शेतकऱ्यांचे आधार कार्ड आठ दिवसांत अपडेट करणे व नवीन आधार काढणे, शक्‍य होईल का, असा प्रश्‍न शेतकऱ्यांना पडला आहे.