परभणी ः वसंतराव नाईक मराठवाडा कृषी विद्यापीठातील कृषी महाविद्यालयातील कृषी पदव्युत्तर पदवी शिक्षणक्रमाच्या तृतीय सत्राच्या प्रवेशाचे वाढीव नोंदणीशुल्क भरणे अशक्य आहे. त्यामुळे या प्रश्नी समाधानकारक तोडगा निघेपर्यंत पुढील सत्रासाठी नोंदणी करणार नाहीत, असे कृषी पदव्युत्तर पदवी शिक्षणक्रमाच्या विद्यार्थ्यांनी कुलगुरू डॉ. अशोक ढवण यांना सोमवारी (ता. २२) निवदेन देऊन कळविले आहे.

कृषी पदव्युत्तर पदवी शिक्षणक्रमाच्या तृतीय सत्राच्या नोंदणी शुल्कात प्रवर्गानुसार अवाजवी वाढ करण्यात आली आहे. सततच्या दुष्काळी स्थितीमुळे शेतकरी पालकांची आर्थिक स्थिती हलाखीची आहे. त्यामुळे वाढीव शुल्क भरण्यास असमर्थ आहोत. शुल्क भरू न शकत असल्यामुळे शिक्षण अर्ध्यावर सोडून देणे हाच पर्याय आहे. त्यामुळे प्रशासकीय यंत्रणेकडून या प्रश्नी समाधानकारक तोडगा निघेपर्यंत विद्यार्थ्यांना नोंदणीसाठी कालावधी देण्यात यावा. अन्यथा सध्याच्या नोंदणी शुल्कानुसार तृतीय सत्राची नोंदणी करणार नसल्याचे कृषी विद्यार्थ्यांनी कुलगुरू डॉ. अशोक ढवण यांना दिलेल्या निवेदनात नमूद केले आहे.