नागपूर ः गेल्या वर्षी गुलाबी बोंड अळीचा झालेला प्रादुर्भाव आणि त्यामुळे झालेल्या नुकसानीच्या पार्श्‍वभूमीवर या वर्षी हंगामपूर्वीच उपाययोजनांवर कृषी खाते भर देणार आहे. शेतकऱ्यांमध्ये या विषयावर जागृतीसाठी कृषी विद्यापीठ तज्ज्ञांच्या उपस्थितीत मेळाव्याचे आयोजन करण्यात येणार आहे. 

गुलाबी बोंड अळीच्या प्रादुर्भावामुळे गेल्या दोन वर्षांपासून कापूस उत्पादक पट्ट्यातील शेतकरी दहशतीत आला आहे. यवतमाळ, नागपूर, वर्धा जिल्ह्यात बोंड अळीच्या प्रादुर्भावाचा फटका बसत शेतकऱ्यांचे मोठे नुकसान झाले होते. गुलाबी बोंड अळी येण्यामागे एचटी, बीटी वाणांची लागवड हेदेखील एक कारण असल्याचे निरीक्षण नोंदविण्यात आले. 

या सर्व निरीक्षणाअंती गुलाबी बोंड अळीचा प्रादुर्भाव होऊ नये याकरिता विविध उपाययोजनांच्या निष्कर्षावर कृषी पोचला आहे. त्यानुसार या हंगामात शेतकऱ्यांना पूर्वहंगामी कापूस लागवड करण्यापासूनदेखील परावृत्त केले जाणार आहे. त्याकरिता कृती आराखडाच कृषी विभागाने तयार केल्याची माहिती आहे.जून महिन्यातच शेतकऱ्यांनी कापसाची लागवड करावी. ज्यांच्याकडे पाण्याची सोय असेल त्यांनादेखील पूर्वहंगामी कापूस लागवडीपासून रोखले जाणार आहे. याविषयावर शेतकऱ्यांमध्ये जागृती व्हावी याकरिता लवकरच एका शेतकरी मेळाव्याचे आयोजन नागपूर विभागीय कृषी सहसंचालक कार्यालय स्तरावर करण्यात येणार आहे.

पूर्वहंगामी कापूस लागवडीमुळे बोंड अळीला पूरक खाद्यान्नाचा पुरवठा होत त्यांची लाइफसायकल पूर्ण होईल. लाइफसायकल ब्रेक होण्यासाठी कापूस लागवड लवकर नको, असे सांगितले जाते. त्यामुळे कृषी विद्यापीठ तज्ज्ञांच्या मार्गदर्शनात शेतकरी मेळावा घेऊन याविषयावर शेतकऱ्यांमध्ये जागृती करण्याचे प्रस्तावित आहे. - रवींद्र भोसले, विभागीय कृषी सहसंचालक, नागपूर