अकोला : अडगाव बुद्रुक (ता. तेल्हारा) येथे सोमवारी शरद जोशी प्रणित शेतकरी संघटनेच्यावतीने एचटीबीटी बियाण्याची लागवड करण्यात आली.  

जिल्ह्यात १० जूनला शेतकरी संघटनेकडून अकोली जहाँगीर येथे सविनय कायदेभंग करीत तंत्रज्ञान स्वातंत्र्य भंडारा घेण्यात आला होता. प्रतिबंधित असलेले एचटीबीटी बियाणे लावण्यात आले. त्यानंतर सोमवारी अडगाव बुद्रुक येथे याच आंदोलनाचा पुढील टप्पा झाला. या वेळी शेतकरी संघटनेचे अध्यक्ष अनिल घनवट, सीमाताई नरोडे, ललित बहाळे, अनिल चव्हाण, सतीश देशमुख, लक्ष्मीकांत कौठकार, राजाभाऊ कुजदेकर, माया कुजदेकर, प्रमिलाताई भारसाकळे, प्रफुल्ल बदरखे, नीलेश नेमाडे यांच्यासह शेकडो कार्यकर्ते, शेतकरी उपस्थित होते. 

देशात शासनाने मागील नऊ वर्षांपासून जीएम तंत्रज्ञानाच्या चाचण्या बंद केल्या आहेत. ही बंदी तातडीने उठविण्यात यावी, शेतकऱ्यांना अत्याधुनिक तंत्रज्ञान, बियाणे मिळावे अशी मागणी शेतकरी संघटनेने लावून धरली आहे. या आंदोलनात अकोट व तेल्हारा तालुक्यांतील शेतकरी एकत्र आले होते. श्री. कौठकर यांच्या शेतात ही बियाणे लागवड करण्यात आली. तत्पूर्वी झालेल्या सभेत श्री. घनवट, श्री. बहाळे, सीमा नरोडे यांच्यासह इतरांनी शेतकऱ्यांना मार्गदर्शन केले.

सरकार तंत्रज्ञानाच्या बाबतीत शेतकऱ्यांवर कसा अन्याय करीत आहे, याची मांडणी वक्त्यांनी आपल्या भाषणातून केली. या आंदोलनाच्या अनुषंगाने कार्यक्रमाच्या ठिकाणी मोठा पोलिस बंदोबस्त ठेवण्यात आला होता. कृषी विभागाचे पथकही याठिकाणी दाखल झालेले होते. सायंकाळपर्यंत कोणताही गुन्हा याप्रकरणात दाखल झालेला नव्हता.