जळगाव ः खानदेशात कांदेबाग केळीची काढणी ९० टक्क्यांवर पूर्ण झाली आहे. उशिरा लागवडीच्या बागांमधील काढणी सुरू आहे. ही काढणीदेखील येत्या १० ते १५ दिवसांत पूर्ण होईल. त्यामुळे केळीची आवकही मोठ्या प्रमाणात घटली आहे. 

कांदेबाग केळीची लागवड खानदेशात जळगाव जिल्ह्यात चोपडा, जळगाव, पाचोरा-भडगाव, धुळ्यातील शिरपूर भागात अधिक होत असते. याच भागात गेल्या वर्षी  नोव्हेंबरअखेर अनेक बागांची लागवड झाली होती. ही लागवड उशिरा झाल्याने काढणी आतापर्यंत सुरू होती. ही काढणी पूर्ण होत आली आहे. कांदेबाग केळीचा काढणी हंगाम ऑक्टोबरमध्ये वेगात सुरू होते. डिसेंबरच्या मध्यात हा काढणी हंगाम पूर्ण होत असतो. 

यंदा काढणी सुमारे २० ते २५ दिवस लांबली. ही काढणी सध्या फक्त शिरपूर, चोपडा भागात सुरू आहे. ऑक्टोबरमध्ये कांदेबाग केळीची आवक बऱ्यापैकी होती. रोज १५५ ते १६० ट्रक (एक ट्रक १५ टन क्षमता) आवक होती. ती आता घटली आहे. 

दर सुधारण्याचे संकेत

रावेरात निर्यातक्षम केळीची काढणी सुरू होईल. या केळीची पाठवणूक विविध कंपन्यांच्या मदतीने आखातात व दिल्ली, पंजाब येथील मॉल्स, मोठ्या खरेदीदारांकडे होईल. यामुळे केळीच्या दरात सुधारणा होईल, असेही संकेत आहेत.