जळगाव  : तापी नदीवरील मुक्ताईनगर व भुसावळनजीकच्या हतनूर धरणातून पाण्याचा विसर्ग सुरू आहे. या धरणात मध्य प्रदेशातून पाण्याचा प्रवाह कायम असून, १० दरवाजे उघडे करण्यात आले आहेत. या धरणातून ७८ क्‍युसेक पाण्याचा विसर्ग होत आहे.

या धरणाचे सुवातीला दोन दरवाजे मागील आठवड्यात उघडण्यात आले होते. सोमवारी (ता. २५) सहा दरवाजे उघडले, तर मंगळवारी (ता. २६) पुन्हा दोन दरवाजे उघडे करण्यात आले. धरणाच्या सांडव्यातूनही पाण्याचा विसर्ग सुरू आहे. हतनूर धरणाच्या क्षेत्रात सुमारे ५ मिलिमीटर पाऊस मंगळवारी झाला आहे.

मंगळवारी दुपारी मुक्ताईनगरसह जळगाव, पाचोरा, धरणगाव, चाळीसगाव, पारोळा, चोपडा, जामनेर, यावल, रावेर, जामनेर, भडगाव, अमळनेर भागात मध्यम स्वरूपाचा पाऊस झाला. त्यात जळगावात बुधवारी सकाळी आठपर्यंत २२, धरणगावात १६, चोपड्यात आठ, यावलमध्ये १२,  मुक्ताईनगरात सहा, पाचोरा येथे १२, चाळीसगावात २२ , भडगावात १४, पारोळा येथे आठ, बोदवड येथे १४ आणि रावेरात आठ मिलिमीटर पाऊस झाल्याची माहिती मिळाली.

चाळीसगाव तालुक्‍यात चांगला पाऊस झाला असूून, मागील तीन दिवस सलग पाऊस झाला आहे. याचा लाभ खरीप पिकांना होणार आहे. जलयुक्त शिवार अभियानासंबंधीची कामे झालेल्या पारोळा, पाचोरा, चाळीसगाव भागात चांगला जलसंचय झाला आहे. या भागातील लहान मोठे असे सुमारे सात साठवण बंधारे पाण्याखाली गेले आहेत. रावेरात मात्र हवा तसा पाऊस या आठवड्यात झालेला नाही. मागील आठवड्यात फक्त पाल, पाडले भागात पाऊस झाला होता.