परभणी : जिल्ह्याच्या तापमानात झालेली वाढ, बाष्पीभवनाचा वाढलेला वेग, बेसुमार उपसा आदी कारणांनी जिल्ह्यातील सिंचन प्रकल्पातील पाणीसाठ्यात झपाट्याने घट होत आहे. जिल्ह्यातील ब्रम्हवाकडी (ता.सेलू) येथील निम्न दुधना प्रकल्पाच्या जलाशयामध्ये उणे (- ३७ टक्के) पाणीसाठा शिल्लक आहे. जिल्ह्यातील ६ लघु तलाव कोरडे पडले आहेत. या प्रकल्पांवर पाणीपुरवठ्यासाठी अवलंबून असलेल्या गावांतील नागरिकांना पाणी टंचाईच्या झळा सोसाव्या लागत आहेत. 

कालव्याव्दारे आवर्तन सुरु असल्यामुळे सोमवारी (ता.४) सकाळी पैठण येथील जायकवाडी धरणात ५२.३६ टक्के उपयुक्त पाणीसाठा होता. माजलगाव धरणात ३७.५५ टक्के, पूर्णा नदीवरील येलदरी धरणात ६९.१७ टक्के, तर सिध्देश्वर धरणात ४४.६५ टक्के, करपरा मध्यम प्रकल्पात ३० टक्के, तर मासोळी प्रकल्पात ४४ टक्के उपयुक्त पाणीसाठा शिल्लक होता. 

जिल्ह्यातील लघु तलावांमध्ये सरासरी १६ टक्के उपयुक्त पाणीसाठा शिल्लक राहिला आहे. त्यात ७ तलावांमध्ये २५ टक्केपर्यंत, ३ तलावांमध्ये ५१ ते ७५ टक्केपर्यंत उपयुक्त पाणीसाठा आहे. २२ पैकी १० तलावांतील उपयुक्त पाणीसाठा संपला आहे. त्यांपैकी ४ तलावांतील पाणीसाठा जोत्याखाली गेला आहे. तर, ६ तलाव कोरडे पडले आहेत. जोत्याखालील तलावांत आंबेगाव, केहाळ, मांडवी, दहेगाव या तलावांचा समावेश आहे.

पेडगाव, वडाळी, जोगवाडा, चिंचोली,आडगाव, भोसी हे सहा तलाव कोरडे पडले आहेत. जिल्ह्याच्या तापमानात ४२ अंश सेल्सिअसपर्यंत वाढ झाली आहे. त्यामुळे बाष्पीभवनाचा वेग वाढला आहे. त्यामुळे पाणीसाठ्यात घट सुरु आहे.