सातारा  : जिल्हा परिषदेच्या शुक्रवारी (ता.१५) झालेल्या सर्वसाधारण सभेत २०१८-१९ वर्षासाठीच्या ४५ कोटी ८८ लाखांच्या पुरवणी अंदाजपत्रकाला मंजुरी देण्यात आली. या अर्थसंकल्पामध्ये कृषी, शिक्षण व बांधकाम विभागाला गेल्या वर्षीच्या तुलनेत वाढीव निधी देण्यात आला. हा निधी मार्चअखेरपर्यंत खर्च होण्यासाठी १५ ऑगस्टपर्यंत प्रशासकीय मान्यता घेण्याबरोबरच निविदा प्रक्रिया राबवून वर्कऑर्डर द्याव्यात, अशा सूचना जिल्हा परिषदेचे अध्यक्ष संजीवराजे नाईक- निंबाळकर आणि मुख्य कार्यकारी अधिकारी डॉ. कैलास शिंदे यांनी विभागप्रमुखांना दिल्या.

 नाईक-निंबाळकर यांच्या अध्यक्षतेखाली शिक्षण व अर्थ सभापती राजेश पवार यांनी मूळ अंदाजपत्रकासह पुरवणी अंदाजपत्रक मांडले. यावर्षी मूळ अंदाजपत्रकात ४५ कोटी ८८ लाख ३४ हजारांची तरतूद केली आहे. त्यामुळे त्यासह ७५ कोटी ८६ लाख ४४ हजारांवर अंदाजपत्रक पोचले.

गेल्या वर्षी पुरवणी अंदाजपत्रक ३४ कोटी ४९ लाखांचे होते. या वर्षी  ते ४५ कोटी ८८ लाखांचे करण्यात आले. त्यामुळे बहुतांश विभागांना निधी वाढवून मिळाला. सप्टेंबर अथवा ऑक्‍टोबरमध्ये मांडले जाणारे पुरवणी अंदाजपत्रक यावर्षी जूनमध्ये मांडल्याने सभागृहाने पदाधिकारी, अधिकाऱ्यांचे अभिनंदन करण्यात आले.

गेल्या वर्षी अंतिम सुधारित अंदाजपत्रकातील तरतूद

कृषी       -   २ कोटी ९५ लाख शिक्षण    -   ५ कोटी ४१ लाख बांधकाम  -  १६ कोटी ४२ लाख

यंदाची तरतूद

कृषी       -   ५ कोटी शिक्षण    -   ५ कोटी ५० लाख बांधकाम  -  २० कोटी