सोलापूर : आषाढी वारीत पाच विद्यापीठांतील ३५ हजार विद्यार्थी सहभागी होऊन वारी स्वच्छ, स्वस्थ, निर्मल आणि हरित वारी करण्यासाठी परिश्रम घेणार आहेत. वारीच्या पूर्वनियोजनासाठी पुण्यश्‍लोक अहिल्यादेवी होळकर सोलापूर विद्यापीठातील बैठकीत हा निर्णय झाला. 

सावित्रीबाई फुले पुणे विद्यापीठ आणि राष्ट्रीय सेवा योजना कक्ष, महाराष्ट्र शासनाच्या समन्वयातून समर्थ भारत अभियानांतर्गत स्वच्छ, निर्मल वारी उपक्रमांतर्गत मंगळवारी (ता.१९) सोलापूर विद्यापीठात बैठक झाली. त्या वेळी या विद्यापीठासह, श्रीमती नाथीबाई दामोदर ठाकरसी महिला विद्यापीठ मुंबई, शिवाजी विद्यापीठ, कोल्हापूर, महाराष्ट्र आरोग्य विज्ञान विद्यापीठ, नाशिक येथील प्रतिनिधींचा समावेश होता.

कुलगुरू डॉ. मृणालिनी फडणवीस, प्र-कुलगुरू डॉ. एस. आय. पाटील, कुलसचिव डॉ. विकास घुटे, परीक्षा व मूल्यमापन मंडळाचे संचालक डॉ. श्रीकांत कोकरे, क्रीडा संचालक डॉ. एस. के. पवार, वित्त व लेखाधिकारी श्रेणिक शहा, विद्यार्थी विकास विभागाचे संचालक डॉ. वसंत कोरे, पुणे विद्यापीठाच्या व्यवस्थापन परिषदेचे सदस्य राजेश पांडे आदी उपस्थित होते. 

आळंदी-देहू ते पंढरपूर या मार्गावर २२ जून ते १५ जुलैदरम्यान पाच विद्यापीठांतील विद्यार्थी स्वच्छता व प्रबोधन करतील. संत तुकाराम  महाराज व संत ज्ञानेश्‍वर माउलींचा पालखी सोहळा जिल्ह्यात आल्यानंतर सोलापूर विद्यापीठ संलग्नित महाविद्यालयातील नऊ हजार विद्यार्थी वारकऱ्यांना मदत करतील. पुणे विद्यापीठाच्या मुख्य क्रीडांगणावर २३ जूनला सकाळी ११ वाजता संकल्प सभा होईल. 

पाच विषयांवर 'लक्ष्य`

स्वच्छता, वृक्षलागवड, व्यसनमुक्ती, निर्मलवारीबाबत पथनाट्यातून प्रबोधन, ५० लाख पत्रावळीचे वाटप, त्यापासून कंपोस्ट खत बनवणे, वनविभाग, सामाजिक वनीकरणाच्या सहकार्यातून ३५ हजार वृक्षांची लागवड, दिंडीच्या मुक्कामी ३५ ठिकाणी आरोग्य शिबिरे,  सेवा सहयोग सामाजिक संस्थेतर्फे निर्मल वारीसाठी दररोज १०० स्वंयसेवक.